வெட்டலின் சாதனையை சமன் செய்த வெர்ஸ்டப்பன்

போர்மியுலா வண் குரான் பிறீ போட்டிகளில் தொடர்ச்சியாக அதிக வெற்றிகளைப் பெற்ற ஜேர்மனியின் செபஸ்டியன் வெட்டலின் சாதனையை நடப்புச் சம்பியனான மக்ஸ் வெர்ஸ்டப்பன் சமப்படுத்தியுள்ளார்.

கடந்த 2013ஆம் ஆண்டு தொடர்ச்சியாக ஒன்பது வெற்றிகளை றெட் புல் அணிக்காக வெட்டல் பெற்றிருந்த நிலையில், சனிக்கிழமை (26)  நடைபெற்ற நெதர்லாந்து குரான் பிறீயை வென்றதோடு றெட் புல் அணியின் வெர்ஸ்டப்பனும் இவ்வாண்டு தொடர்ச்சியாக ஒன்பது வெற்றிகளைப் பெற்றுள்ளார்.

இப்பந்தயத்தை ஐந்தாமிடத்திலிருந்து ஆரம்பித்த அஸ்தன் மார்டின் அணியின் பெர்ணாண்டோ அலோன்ஸோ இரண்டாமிடத்தையும், 12ஆம் இடத்திலிருந்து ஆரம்பித்த அல்பைன் அணியின் பியர் கஸ்லி மூன்றாமிடத்தையும் பெற்றனர்.

இவ்வாண்டுக்கான சம்பியன்ஷிப் புள்ளிகள் பட்டியலில் 339 புள்ளிகளுடன் முதலாமிடத்தில் நெதர்லாந்தின் வெர்ஸ்டப்பன் உள்ளார். 201 புள்ளிகளுடன் இரண்டாமிடத்தில் அவரின் சக றெட் புல் அணி வீரரான சேர்ஜியோ பெரேஸும், 168 புள்ளிகளுடன் மூன்றாமிடத்தில் ஸ்பெய்னின் பெர்ணாண்டோ அலோன்ஸோவும் காணப்படுகின்றனர்.