வெஸ்ட் ஹாமை வென்றது ஆர்சனல்

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், வெஸ்ட் ஹாம் யுனைட்டெட்டின் மைதானத்தில் இன்று அதிகாலை நடைபெற்ற அவ்வணியுடனான போட்டியில் ஆர்சனல் வென்றது.

இப்போட்டியின் 38ஆவது நிமிடத்தில், சக மத்தியகளவீரர் பப்லோ ஃபொர்னால்ஸிலிருந்து வந்த பந்தை தலையால் முட்டிக் கோலாக்கிய வெஸ்ட் ஹாம் யுனைட்டெட்டின் பின்களவீரர் அஞ்செலோ ஒக்பொன்னா, தனதணிக்கு முன்னிலையை வழங்கினார்.

எனினும், போட்டியின் 60ஆவது நிமிடத்தில், மாற்றுவீரராகக் களமிறங்கிய சக பின்களவீரர் சியட் கொலைஸக்கிடமிருந்து பெற்ற பந்தைக் கோலாக்கிய ஆர்சனலின் முன்களவீரர் கப்ரியல் மார்டினெல்லி கோலெண்ணிக்கையைச் சமப்படுத்தினார்.

அடுத்த ஆறாவது நிமிடத்தில், அணித்தலைவரும் சக முன்களவீரருமான பியரி-எம்ரிக் அபுமெயாங்கிடமிருந்து பெற்ற பந்தைக் கோலாக்கிய ஆர்சனலின் இன்னொரு முன்களவீரரான நிக்கொலஸ் பெப்பே தனதணிக்கு முன்னிலையை வழங்கினார்.

இதையடுத்த மூன்றாவது நிமிடத்தில், நிக்கொலஸ் பெப்பேயிடமிருந்து பெற்ற பந்தை பியர்-எம்ரிக் ஒபமெயாங்க் கோலாக்கியதோடு இறுதியில் 3-1 என்ற கோல் கணக்கில் ஆர்சனல் வென்றது.