சுயதொழில் மேம்பாட்டுக்காக 13 குடும்பங்களுக்கு நிதியுதவி

-ஏ.எச்.ஏ.ஹுஸைன்

மட்டக்களப்பு, வவுணதீவு பிரதேச செயலகப் பிரிவில் வறுமைக் கோட்டுக்கு கீழுள்ள குடும்பங்களில்  தெரிவுசெய்யப்பட்ட 13 குடும்பங்கள்  சுயதொழில்  மேற்கொற்கொள்வதற்காக குடும்பமொன்றுக்கு 20,000 ரூபாய் படி நேற்றுமுன்தினம் வெள்ளிக்கிழமை  நிதியுதவி வழங்கப்பட்டதாக அப்பிரதேச செயலாளர் எஸ்.சுதாகர் தெரிவித்தார்.

கால்நடை வளர்ப்பு, விவசாயம், சிறு வியாபாரம், குடிசைக் கைத்தொழில் உள்ளிட்ட சுயதொழில்களை மேற்கொண்டு குடும்ப பொருளாதாரத்தை தேடிக்கொள்ளும் முகமாக கிழக்கு மாகண சமூக சேவைகள் திணைக்களத்தினால் இந்த நிதியுதவி வழங்கப்பட்டதாகவும் அவர் கூறினார்.

வவுணதீவு பிரதேச செயலகத்தில் நடைபெற்ற  இந்நிகழ்வில்  பிரதேச செயலாளர் எஸ்.சுதாகர், உதவி பிரதேச செயலாளர் எஸ்.ராஜ்பாபு, மாவட்ட சமூகசேவை உத்தியோகஸ்தர் எஸ்.அருள்மொழி, பிரதேச சமூக சேவை அபிவிருத்தி உத்தியோகஸ்தர் நவலெட்சுமி தயாபரன் மற்றும் பயனாளிகள் கலந்து கொண்டனர்.