இரட்டைப் படுகொலைச் சந்தேகநபர்கள் அறுவருக்கும் விளக்கமறியல்

ஏ.எச்.ஏ. ஹுஸைன்

ஏறாவூர் நகர பிரதேசத்தில் முகாந்திரம் வீதி முதலாவது குறுக்கு ஒழுங்கையிலுள்ள வீட்டில் இடம்பெற்ற இரட்டைப் படுகொலைச்சம்பவம் தொடர்பில் கைதுசெய்யப்பட்டு விளக்கமறியலில் வைக்கப்பட்டிருந்த அறுவரையும் எதிர்வரும் 30ஆம் திகதி வரை விளக்கமறியலில் வைக்குமாறு, மாவட்ட பதில் நீதிபதி வி. தியாகேஸ்வரன், இன்றுபுதன்கிழமை (16) உத்தரவிட்டார்.

இச்சம்பவத்தில், தாயான  நூர்முஹம்மது உஸைரா (வயது 56) அவரது திருமணமாகிய மகளான ஜெனீரா பானு மாஹிர் (வயது 32) ஆகியோர் படுகொலை செய்யப்பட்டிருந்தனர்.

சம்பவம் தொடர்பாக கைது செய்யப்பட்டு நேற்று (16) வரை  விளக்கமறியலில் வைக்கப்பட்டிருந்த அறுவரும் மாவட்ட பதில் நீதிபதி வி. தியாகேஸ்வரன்  முன்னிலையில், ஏறாவூர் சுற்றுலா நீதவான் நீதிமன்றத்தில் ஆஜர்படுத்தப்பட்டபோதே, நீதிபதி மேற்கண்டவாறு உத்தரவிட்டார்.

கொல்லப்பட்ட பெண்ணின் கணவனுடைய சகோதரன் (வயது 24) மற்றும் 29, 23, 23, 30, 50 வயதான சந்தேகநபர்களே விளக்கமறியலில் வைக்கப்பட்டுள்ளனர். 

மட்டக்களப்பு சிறைச்சாலை அதிகாரிகளால் இச்சந்தேக நபர்கள், மட்டக்களப்பு சிறைச்சாலையிலிருந்து ஏறாவூர் சுற்றுலா நீதவான் நீதிமன்றத்துக்கு அழைத்துவரப்பட்டு ஆஜராக்கப்பட்ட வேளையில் நீதிமன்ற வளாகத்தைச் சுற்றி பொலிஸ் பாதுகாப்பு பலப்படுத்தப்பட்டிருந்தது.