கடுகதி ரயிலில் மோதி முச்சக்கர வண்டி சேதம்

பாதுகாப்பற்ற ரயில் கடவையை கடக்க முற்பட்ட முச்சக்கர வண்டி, மட்டக்களப்பிலிருந்து கொழும்பு நோக்கிச் சென்ற கடுகதி ரயிலில் மோதியதில், குறித்த முச்சக்கர வண்டி சேதமடைந்துள்ளதாக, வாழைச்சேனை பொலிஸ் நிலைய பொறுப்பதிகாரி தனஞ்ஜய பெரமுன தெரிவித்தார்.

வாழைச்சேனை ரயில் நிலையத்துக்கும் புணாணை ரயில் நிலையத்துக்கும் இடைப்பட்ட மஜ்மா நகர் பாதுகாப்பற்ற ரயில் கடவையால் வாழைச்சேனையில் இருந்து மஜ்மா நகர் கிராமத்துக்குச் சென்ற முச்சக்கர வண்டியே, நேற்றிரவு 9.15 மணியளவில் மோதுண்டுள்ளது.

முச்சக்கர வண்டியில் சென்ற சாரதியுடன் நால்வர் எவ்விதக் காயங்களுமின்றி உயிர் தப்பியுள்ளனர் என்பதுடன், முச்சக்கர வண்டி நீண்ட தூரம் தூக்கி எறியப்பட்டுள்ளதாகவும் வாழைச்சேனை பொலிஸ் நிலைய பொறுப்பதிகாரி தெரிவித்தார்.

இச்சம்பவம் தொடர்பாக வாழைச்சேனை போக்குவரத்து பொலிஸார் விசாரணைகளை மேற்கொண்டு வருகின்றனர்.