மட்டக்களப்பில் 889 பேர் ஆலோசனைகள் முன்வைப்பு

-ஏ.எச்.ஏ.ஹுஸைன்

பொதுமக்களிடமிருந்து கருத்துகளைப் பெறும் நல்லிணக்கப் பொறிமுறை பற்றிய கலந்தாலோசனைக்கான செயலணியிடம்; மட்டக்களப்பு மாவட்டத்திலிருந்து 889 பேர் ஆலோசனைகளையும் கருத்துகளையும் முன்வைத்துள்ளதாக அச்செயலணியின் மட்டக்களப்பு மாவட்டக் குழுச் செயலாளர் ஏ.காண்டீபன் தெரிவித்தார்.

நல்லிணக்க பொறிமுறை பற்றிய கலந்தாலோசனைக்கான செயலணியின் அமர்வு, மட்டக்களப்பு மாவட்டத்தில் கடந்த 09ஆம் திகதியிலிருந்து 18ஆம் திகதிவரை நடைபெற்றது.

வாழைச்சேனை,  களுவாஞ்சிக்குடி, மட்டக்களப்பு, வாகரை, பட்டிப்பளை ஆகிய பிரதேச செயலகங்களில் இதன் அமர்வுகள் நடைபெற்றன.

வாழைச்சேனையில் 278 பேரும் களுவாஞ்சிக்குடியில் 77 பேரும்  மட்டக்களப்பில் 209 பேரும்  வாகரையில் 90 பேரும் பட்டிப்பளையில் 235 பேரும் தங்களின் கருத்துகளையும் ஆலோசனைகளையும்  முன்வைத்துள்ளனர்.

இந்த ஆலோசனைகளிலும் கருத்துகளிலும் அதிகமானவை காணாமல் போனோர் சம்பந்தப்பட்ட விடயங்களாக உள்ளன. இதற்கு அடுத்ததாக  காணிகள் சம்பந்தப்பட்ட விடயங்கள் உள்ளன.  மூன்றாவது இடத்தில் இனப்படுகொலை பற்றிய விடயங்கள் உள்ளதாகவும் அவர் கூறினார்.