வீட்டு ஜன்னல் உடைக்கப்பட்டு கொள்ளை

-ஏ.எஸ்.எம்.முஜாஹித், அஸ்லம் எஸ்.மௌலானா

கல்முனை பொலிஸ் பிரிவிலுள்ள கல்முனைக்குடி - 03 செயிலான் வீதியிலுள்ள வீடொன்றில் 7 இலட்சத்து 25ஆயிரம் பெறுமதியான நகைகள், நேற்று வெள்ளிக்கிழமை (12) இரவு ஜன்னல் உடைக்கப்பட்டு கொள்ளையிடப்பட்டுள்ளதாக கல்முனைப் பொலிஸில் முறைப்பாடு செய்யப்பட்டுள்ளதாக பொலிஸார் தெரிவித்தனர்.

இது தொடர்பான முறைப்பாட்டை வீட்டு உரிமையாளரான சாஹூல் ஹமீட் முஹம்மட் றிஸ்வான் பதிவு செய்துள்ளார். 

இம்முறைப்பாட்டில், தாங்கள் பிற்பகல் 5 மணிக்கு வைத்தியசாலைக்கு சென்று மீண்டும் இரவு 09 மணியளவில் வீடுதிரும்பிய நிலையிலேயே இக்கொள்ளைச் சம்பவம் இடம்பெற்றுள்ளதாகத் தெரிவித்துள்ளார்.

இக்கொள்ளைச் சம்பவம் தொடர்பான மேலதிக விசாரணைகளை கல்முனை பொலிஸார் மேற்கொண்டு வருகின்றனர்.