விபத்தில் எகிப்து நாட்டவர் உட்பட மூவர் காயம்

வாழைச்சேனை, கறுவாக்கேணி பாடசாலை வீதியில் இரண்டு மோட்டார் சைக்கிள்கள் நேருக்கு நேர் மோதி விபத்துக்குள்ளானதில், எகிப்து நாட்டவர் உட்பட மூவர் காயமடைந்துள்ளனரென வாழைச்சேனைப் பொலிஸ் நிலையப் பொறுப்பதிகாரி தனஞ்ஜய பெரமுன தெரிவித்தார்.

மீராவோடையில் இருந்து வந்த மோட்டார் சைக்கிளும் சுங்கான்கேணியில் இருந்து வந்த மோட்டார் சைக்கிளுமே, இவ்வாறு இன்று (30) காலை விபத்துக்குள்ளாகின.

இந்த விபத்தில் காயமடைந்த எகிப்து நாட்டைச் சேர்ந்த ஓட்டமாவடி அரபுக் கல்லூரி விரிவுரையாளர் அப்துல் அலீம் ஷலாஹ் (வயது 58) என்பவர், வாழைச்சேனை ஆதார வைத்தியசாலையில் அனுமதிக்கப்பட்டு, மேலதிக சிகிச்சைக்காக மட்டக்களப்பு போதனா வைத்தியசாலைக்கு மாற்றப்பட்டுள்ளார்.

அத்துடன், காயமடைந்த மீராவோடை ஆர்.சி. வீதி அறபா ஒழுங்கையில் வசிக்கும் எம்.ஏ.எம்.சுந்துஸ் (வயது 25), சுங்காங்கேணி எல்லை வீதியைச் சேர்ந்த சி.ரமேஸ் (வயது 36) ஆகியோர் வாழைச்சேனை ஆதார வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.

இவ்விபத்துத் தொடர்பான மேலதிக விசாரணைகளை, வாழைச்சேனைப் பொலிஸார் மேற்கொண்டு வருகின்றனர்.