என்னை இழப்பதற்கு யாரும் விரும்பவில்லை: வடிவேல் சுரேஷ்

'ஊவா மாகாணத்தில் சிறந்த கல்வியமைச்சராக செயற்பட்ட என்னை இழப்பதற்கு புத்திஜீவிகளும் ஆசிரியர்களும்; விரும்பவில்லை. இதனால், என்னை தொடர்ந்து ஊவா மாகாண கல்வி அமைச்சராக செயற்படுமாறு கோரிவருகின்றனர்' என ஊவா மாகாணத்தில் ஐக்கிய தேசியக் கட்சியின் சார்பில் போட்டியிட்டு வெற்றிபெற்ற வடிவேல் சுரேஷ் தெரிவித்தார்.

புதிய அரசாங்கத்தில் அடுத்தக்கட்ட நிலைப்பாடு என்ன என்பது தொடர்பில் தொடர்புகொண்டு கேட்டபோதே அவர் இவ்வாறு கூறினார். இதுதொடர்பில் தொடர்ந்தும் தெரிவித்த அவர்,

'நடந்து முடிந்த நாடாளுமன்ற தேர்தலில் ஐக்கிய தேசியக் கட்சியின்சார்பில் போட்டியிட்ட என்னை, மக்கள் அமோக வாக்குகளை வழங்கி நாடாளுமன்றத்துக்கு அனுப்பினர்;.

கல்வி அமைச்சராக ஊவா மாகாணத்தில் சிறந்த சேவைகளை ஆற்றியதால் அச்சேவை மீண்டும் தொடர வேண்டுமென மக்கள் விரும்புகின்றனர். அவ்வாறு இல்லாத பட்சத்தில் போராட்டங்களை முன்னெடுக்கவுள்ளதாகவும் தெரிவிக்கின்றனர்.

இந்நிலையில், ஊவா மாகாணத்தில் தொடர்ந்து கல்வியமைச்சராக செயற்படுவதா அல்லது நாடாளுமன்றத்துக்குச் செல்வதா என்பது தொடர்பில் இன்னும் தீர்மானிக்கவில்லை. இதுகுறித்து உயர்மட்ட ரீதியில் பேச்சுவார்த்தைகளில் ஈடுபட்டு வருகின்றோம்' என அவர் மேலும் கூறினார்.