’குடிநீரைப் பயன்படுத்தி இரசாயனம் கலப்பதை நிறுத்தவேண்டும்’

நுவரெலியா பிரதே செயலாளர் பிரிவுக்குட்பட்ட வட்டகொட, யொக்ஸ்போர்ட் தோட்டத்தில், தேயிலை மரங்களுக்கு தெளிப்பதற்காக இரசாயனங்களைக் கலப்பதற்கு, பிரதேச மக்களின் குடிநீர் பயன்படுத்தப்பட்டு வருவதாக, பிரதேச மக்கள் குற்றஞ்சாட்டியுள்ளனர்.

குறித்த குடிநீர் குழாயை, ஒரு இடத்தில் கழற்றி, அதிலிருந்து பெறும் நீரைப் பயன்படுத்தி இரசாயனத்தைக் கலந்தபின்னர், மீண்டும் குழாயைப் பொறுத்தி விடுவதாகவும் இதன்மூலம், குறித்த குழாய் நீர் வழியாக, இரசாயனப் பதார்த்தம் சிறிதளவேனும் கலந்திருக்காதா என்று மக்கள் கேள்வியெழுப்பியுள்ளனர்.

தேயிலை மரங்களை வளர்க்க, தோட்ட நிர்வாகங்கள் பல்வேறு திட்டங்களை முன்னெடுப்பதைப் போன்றே, தோட்டத்திலுள்ளவர்களைப் பாதுகாப்பதும், தோட்ட நிர்வாகத்தின் கடமை என்றும் எனவே, இவ்வாறு குடிநீர் வரும் குழாயை கழற்றி, இரசாயனப் பதார்த்தம் கலப்பதை நிறுத்தவேண்டும் என, மக்கள் வேண்டுகோள் விடுத்துள்ளனர்.