சீரற்ற வானிலையால் மரக்கறி தோட்டங்கள் சீரழிந்தன

மலையகத்தில் தொடர்ந்து நிலவிவரும் சீரற்ற வானிலை காரணமாக, சிறு தோட்ட விவசாயிகள் வெகுவாகப் பாதிக்கப்பட்டுள்ளனர்.

விவசாயக் காணிகளில் பயிரிடப்பட்டுள்ள மரக்கறி வகைகள் அனைத்தும், வெள்ள நீரிவில் அடித்துச் செல்லப்பட்டுள்ளதாகவம் இதனால், இம்முறை தங்களுக்கு கிடைக்கவேண்டியிருந்த வருமானம் இல்லாமல் போய்விட்டது என்றும், விவசாயிகள் தெரிவித்தனர்.

கரட், உருளைக் கிழங்கு, லீக்ஸ், கோவா, போஞ்சி உள்ளிட்ட மரக்கறி வகைகளை உற்பத்தி செய்வதற்கு, அதிகளவு பணம் செலவு செய்யப்பட்டபோதிலும், எதிர்பாராத விதமாக, தற்போது நட்டத்தை எதிர்நோக்க வேண்டியுள்ளதாக, தெரிவிக்கப்படுகின்றது.

எனவே, இவ்வாறு ​நட்டத்தை எதிர்நோக்கியுள்ள விவசாகளுக்குத் தேவையான நிவாரண உதவிகளை வழங்க, அதிகாரிகள் முன்வரவேண்டும் என, கோரிக்கை விடுக்கப்பட்டுள்ளது.