’தற்போதைய அரசாங்கத்தின் 7 பேர்ச் திட்டம் சரியில்லை’

க.கமல்

தற்போதைய அரசாங்கம் மலையக மக்களுக்க வழங்கியுள்ள வீட்டுத்திட்டம் மக்களுக்கு பயனுடையதாக இல்லையென தெரிவிக்கும் நுவரெலியா மாநகரசபை உறுப்பினர் சிவரஞ்சனி சிவகுமாரன், மலையக மக்களுக்கு சொந்த வீட்டுடன் 20 பேர்ச்சஸ் காணியும் வழங்கப்பட வேண்டுமென கோரினார்.

அடுத்த முறை பொதுஜன பெரமுன ஆட்சியமைக்கும் பட்சத்தில் உயர் மட்டத்தினருடன் பேச்சுவார்த்தைகளை நடத்தி அந்தத் திட்டத்தை நடைமுறைப்படுத்த எதிர்பார்ப்பதாகவும் அவர் தெரிவித்தார். 

கொழும்பிலுள்ள எதிர்க்கட்சித் தலைவர் அலுவலகத்தில் நேற்று (18) நடைபெற்ற ஊடகவியலாளர் சந்திப்பொன்றில் கலந்துகொண்டு மேலும் கருத்துரைத்த அவர், 

கடந்த ஜனாதிபதித் தேர்தலின் போது மலையக மக்களை ஏமாற்றியே தற்போதைய ஆ​ட்சியாளர்கள் வாக்குகளை பெற்றுக்கொண்டனர் எனவும், இன்றளவிலும் மக்களை  ஏமாற்றிக்கொண்டிருக்கும் ஆட்சியாளர்களால் மலையகத்தில் கட்டிக்கொடுக்கும் வீடுகள் தரம் குறைந்த பொருள்களை கொண்டு கட்டப்பட்டவை எனவும் சாடினார். 

அதேபோல், 1,000 ரூபாய் சம்பள அதிகரிப்பை தோட்ட தொழிலாளர்களுக்கு பெற்றுகொடுப்பதாக கூறியதும் போலியான வாக்குறுதியாக மாறிவிட்டதெனவும்,  மலையகத்தில் உள்ள தேயிலை தோட்டங்கள் திட்டமிட்ட வகையில் காடுகளாக்கப்பட்டு வருவதாகவும் தெரிவித்தார். 

அதே​போல், வா​ழ்வாதாரத்தை கருத்தில் கொண்டு வெளிநாடுகளுக்கு செல்லும் பெண்களில் குடும்பங்கள் சமூக சீரழிவுகளுக்கு முகம்கொடுத்து வருவதாகவும், வெளிநாடு செல்லும் மலையக பெண்களுக்கு எந்தவொரு பாதுகாப்பும் வழங்கப்படுவதில்லை எனவும் சாடினார். 

முன்னாள் ஜனாதிபதி மஹிந்த ராஜபக்ஷவின் காலத்தில் மலையகத்தின் வீதிகள் உள்ளிட்ட அடித்தள கட்டமைப்புகள் விஸ்தரிக்கப்பட்டதாக தெரிவித்த அவர், யுத்தம் நிறைவு செய்யப்பட்டதாலேயே மலையக மக்களும் சுதந்திரமாக எல்லா பகுதிகளுக்கும் சென்று வர முடிவதாகவும் தெரிவித்தார்.