முன்னாள் கடற்படை வீரரிடம் பணம் கொள்ளை; மூவர் சிக்கினர்

நவீ    

கம்பளையில் முன்னாள் கடற்படை வீரர் ஒருவரிடமிருந்து, 3 இலட்சத்து 18 ஆயிரம் ரூபாய் பணத்தைக் கொள்ளையிட்ட மூவரை, கம்பளை பொலிஸார் நேற்று முன்தினம் (4) கைதுசெய்துள்ளனர். 

கம்பளை நகருக்கு கடந்த 28ஆம் திகதி வருகை தந்த   முன்னாள் கடற்படை அதிகாரி ஒருவர்,  வீடு நிர்மாணப் பணிகளுக்காக வங்கியிலிருந்து 3 இலட்சத்து 10 ஆயிரம் ரூபாயை எடுத்துள்ளார். அத்துடன் அவரிடம் ஏற்கெனவே 10 ஆயிரம் ரூபாயும் இருந்துள்ளது.

இந்நிலையில் பணத்தை எடுத்துக்கொண்டு கம்பளை நகரிலுள்ள தனியார் பஸ் தரிப்பிடத்துக்குச் சென்ற அவர், ஓட்டோ ஒன்றில் பயணித்துள்ளார்.

ஓட்டோவில் பயணித்தபோதே, அவரிடமிருந்து பணம் கொள்ளையிடப்பட்டுள்ளதாகத் தெரியவருகிறது.

இதுத் தொடர்பில் கம்பளை பொலிஸில் செய்த முறைப்பாட்டுக்கு அமைவாக விசாரணைகளை மேற்கொண்டு வந்த பொலிஸார், 23,27, 39 வயதுடைய மூவரை கைதுசெய்துள்ளனர்.

கொள்ளையடித்த பணத்தில் 75 ரூபாய்க்கு ஓட்டோவொன்றை வாங்கியுள்ள மேற்படி மூவரும் ஏனைய பொருட்கள் பலவற்றையும் கொள்வனவு செய்துள்ளனர்.
மேற்படி மூவரையும் நீதிமன்றில் ஆஜர்படுத்தவுள்ள பொலிஸார் மேலதிக விசாரணைகளை மேற்கொண்டு வருகின்றனர்.