பாதசாரி கடவையை பயன்படுத்தாமல் வீதியை கடந்த நபருக்கு அபராதம்

(ரி.பாருக் தாஜுதீன்)

பாதசாரிகளுக்கான மஞ்சள் கடவையை பயன்படுத்தாமல் வீதியை கடந்ததாக குற்றம் சுமத்தப்பட்ட நபர் ஒருவருக்கு கொழும்பு போக்குவரத்து நீதிமன்ற நீதவான் இன்று 100 ரூபா அபராதம் விதித்தார்.

மொஹமட் அன்சார் மொஹமட் முஸ்தபா எனும் இந்நபர் போக்குவரத்து நீதிமன்ற நீதவான் ஜெயராம் ட்ரொஸ்கி முன்னிலையில் ஆஜர்படுத்தப்பட்டார்.

பாதசாரிகளுக்கான கடவை விதியை மீறும் நபர்களுக்கு அறிவூட்டுவதற்காக தாம்  வகுப்பொன்றை நடத்துவதாக பொலிஸார் நீதிமன்றில் தெரிவித்தனர். இந்நபரை ஞாயிறன்று வகுப்புக்கு வருமாறு உத்தரவிடப்பட்டிருந்தபோதிலும் அவர் சமுகமளிக்கவில்லை என பொலிஸார் கூறினர்.

பாதசாரிகளுக்கான மஞ்சள் கடவையிலிருந்து 50 மீற்றர் தூரத்திற்குட்பட்ட பகுதியில் மஞ்சள் கடவையை பயன்படுத்தாமல் வீதியை கடப்பது குற்றமாகும் என பொலிஸார் தெரிவித்தனர்.

இந்நிலையில், குற்றம் சுமத்தப்பட்ட நபருக்கு 100 ரூபா அபராதம் விதித்த நீதவான் வீதி ஒழுங்குகளை பின்பற்றுமாறும் எச்சரித்தார்.