பஸ்ஸில் யுவதியின் காற்சட்டையை வெட்டியதாக நபரொருவர் மீது வழக்கு

(லக்மால் சூரியகொட)

பஸ்ஸில் பயணம் செய்த யுவதியொருவரின் காற்சட்டையை பிளேட்டினால் வெட்டியதன் மூலம் அவருக்கு பாலியல் ரீதியில் தொந்தரவு ஏற்படுத்தியதாக நபரொருவருக்கு எதிராக வழக்குத் தொடரப்பட்டுள்ளது.

கொள்ளுபிட்டியில் இச்சம்பவம் நடந்ததாக மேற்படி யுவதி கொழும்பு கோட்டை நீதவான் லங்கா ஜயரட்ன முன்னிலையில் சாட்சியமளித்தார்.

பயணிகள் பலரின் முன்னிலையில் நடந்த இச்சம்பவத்தினால் தான் மிகுந்த அசௌகரியத்துக்குள்ளானதாக அப்பெண் தெரிவித்தார்.

மேற்படி சந்தேக நபரை கடமையிலிருந்த பொலிஸ் உத்தியோகஸ்தர் ஒருவர் கைது செய்ததுடன் அந்நபர் பயன்படுத்தியதாக கூறப்படும் பிளேட்டையும் கைப்பற்றினார்.

இச்சந்தேக நபர் களுத்துறை வடக்கை வதிவிடமாகக் கொண்டவர் என அடையாளம் காணப்பட்டுள்ளார்.

வெட்டப்பட்ட காற்சட்டையையும் சந்தேக நபர் பயன்படுத்திய பிளேட்டையும் நீதிமன்றத்தில் பொலிஸார் சமர்ப்பித்தனர்.
இவ்வழக்கு எதிர்வரும் மார்ச் முதலாம் திகதிக்கு ஒத்திவைக்கப்பட்டது.