அதிபர் நியமனங்களில் இனம்,மதம் கருத்திற் கொள்ளப்படுவதில்லை: மேல் மாகாண முதலமைச்சர்

(ஒலிந்தி ஜயசுந்தர)

இரத்மலானை இந்துக் கல்லூரி அதிபர் எதிர்ப்பு காரணமாக நீக்கப்பட்ட போதிலும், பாடசாலை அதிபர் நியமனங்களின்போது இனம், மதம் என்பவற்றை அதிகாரிகள் கருத்திற்கொள்வதில்லை என மேல் மாகாண முதலமைச்சர் பிரசன்ன ரணதுங்க நேற்று வியாழக்கிழமை கூறினார்.

இக்கல்லூரியின் அதிபராக நியமிக்கப்பட்ட ஆர். உதயகுமார் அப்பதவியிலிருந்து நீக்கப்பட்டமை குறித்து கேட்டபோதே அவர் இவ்வாறு தெரிவித்தார். உதயகுமார் இந்துவாக இருந்தபோதிலும் அவரின் மனைவி கிறிஸ்தவர் என்பதால் இந்நியமனத்திற்கு சிலர் எதிர்ப்பு தெரிவித்தனர்.

இது தொடர்பாக முதலமைச்சர் பிரசன்ன ரணதுங்க கூறுகையில்,

'மேல் மாகாணத்திலுள்ள பாடசாலைகளின் அதிபர் நியமனங்கள் விளம்பரங்கள் மூலமாக பொதுமக்களுக்கு அறிவிக்கப்பட்டு மேற்கொள்ளப்படுகிறது. இவ்விடயத்தில் நாம் மதம், இனம் ஆகியவற்றை கவனத்தில்  கொள்வதில்லை. திறமை, அனுபவம் ஆகியவற்றின் அடிப்படையிலேயே இந்நியமனங்கள் மேற்கொள்ளப்படுகின்றன' என்றார்.

உதயகுமாரின் நியமனம் குறித்து அவர் கூறுகையில், 'பாடசாலை அதிகாரிகள் அவரை ஏற்றுக் கொள்ளாததால் நாம் அவரை வைத்திருக்க முடியவில்லை. எனவே புதிய அதிபரின் மூலம் அவர் மாற்றீடு செய்யப்படுவார். உதயகுமார் நீக்கப்பட்டுள்ளதுடன் நிரந்தர அதிபர் நியமிக்கப்படும்வரை தற்காலிக அதிபர் ஒருவர் நியமிக்கப்பட்டுள்ளார். இவ்வெற்றிடம் விளம்பரப்படுத்தப்பட்டு, வர்தமானியில் வெளியிடப்படும்' என்றார்.