சிறுமி துஸ்பிரயோகம்; 7 கடற்படை வீரர்களுக்கு பிணை

Menaka Mookandi / 2014 ஜூலை 21 , பி.ப. 12:39 - 0 - {{hitsCtrl.values.hits}}

-சொர்ணகுமார் சொரூபன், செல்வநாயகம் கபிலன்

யாழ்., காரைநகர்ப் பகுதியினைச் சேர்ந்த 11 வயதுச் சிறுமியொருவரை பாலியல் துஸ்பிரயோகத்திற்கு உட்படுத்தியமை தொடர்பில் சந்தேகத்தில் கைது செய்யப்பட்ட 7 கடற்படை வீரர்களும் தலா 50 ஆயிரம் ரூபா ஆட்பிணையில் செல்ல சிறுவர் நீதவான் நீதிமன்ற நீதவான் கறுப்பையா ஜீவராணி இன்று திங்கட்கிழமை (21) உத்தரவிட்டார்.

அத்துடன், மேற்படி வழக்கினை எதிர்வரும் 25 ஆம் திகதிக்கு நீதவான் ஒத்திவைத்தார்.
கடற்படை வீரர்களின் உறவினர்கள், தங்கள் பகுதி கிராம அலுவலரின் கடிதங்கள் பெற்று இன்று (21) மன்றில் சமர்ப்பித்து அவர்களை பிணையில் எடுத்துள்ளனர்.

மேற்படி வழக்கு கடந்த வெள்ளிக்கிழமை (18) விசாரணைக்கு எடுத்துக்கொள்ளப்பட்ட போது, ஏலாரைக் கடற்படை முகாமிலிருந்த கடற்படைச் சிப்பாய்கள் அடையாள அணி வகுப்பிற்கு உட்படுத்தப்பட்டனர்.

எனினும், இதன்போது சிறுமி எவரையும் அடையாளங்காட்டவில்லை. இதனால், அன்றைய தினம் 7 கடற்படைச் சிப்பாய்களையும் விளக்கமறியலில் வைத்து நீதவான் உத்தரவிட்டார்.

பாடசாலை செல்லும் இச்சிறுமியினை ஏலாரை கடற்படை முகாமிற்குள் அழைத்துச் சென்று 11 நாட்களாக பாலியல் துஸ்பிரயோகம் செய்துள்ளதாக சிறுமியின் பெற்றோர் செவ்வாய்க்கிழமை (15) ஊர்காவற்றுறைப் பொலிஸ் நிலையத்தில் முறைப்பாடு பதிவு செய்திருந்தனர்.

இந்த முறைப்பாட்டிற்கு அமைய ஊர்காவற்றுறைப் பொலிஸார் யாழ்.சிறுவர் நீதவான் நீதிமன்றத்தில் வழக்குப் பதிவு செய்தனர்.

சிறுமி பாலியல் துஸ்பிரயோகம் செய்தமையினைக் கண்டித்து காரைநகர் பிரதேச செயலகத்திற்கு முன்பாக வெள்ளிக்கிழமை (18) கண்டனப் போராட்டம் ஒன்று நடத்தப்பட்டமை குறிப்பிடத்தக்கது.

அத்துடன், மேற்படி சிறுமியுடன் மேலும் ஒரு 9 வயதுச் சிறுமியும் பாலியல் துஸ்பிரயோகத்திற்கு உள்ளாக்கப்பட்டதாகக் கூறப்பட்ட போதும், இது தொடர்பில் ஊர்காவற்றுறைப் பொலிஸ் நிலையத்தில் வழக்குப் பதிவு செய்யப்படவில்லை.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .