கடத்தப்பட்ட பெண் சடலமாக மீட்பு

(கவிசுகி)

யாழ். மீசாலை கிழக்கு பகுதியில் நேற்று வெள்ளை வானொன்றில் கடத்தி செல்லப்பட்ட பெண், சாவகச்சேரி பெருங்குளம் காட்டுப் பகுதியில் இன்று திங்கட்கிழமை சடலமாக மீட்கப்பட்டுள்ளதாக சாவகச்சேரி பொலிஸார் தெரிவித்தனர்.

மீசாலை கிழக்கை சேர்ந்த கணவரை விட்டு பிரிந்து, உறவினர்களுடன் வாழ்ந்து வந்த 38 வயதான பெண்ணொருவரே கொலை செய்யப்பட்டுள்ளவராவர்.

இது தொடர்பாக அவரின் கணவரை சாவகச்சேரி பகுதியில் வைத்து கடத்தலுக்கு பயன்படுத்தப்பட்ட வெள்ளை வானுடன் சாவகச்சேரி  பொலிஸார் கைது செய்துள்ளனர்.

இப்பெண்ணின் சடலத்தை மருத்துவ பரிசோதனைக்கு உட்படுத்துமாறு சாவகச்சேரி நீதிபதி ம. கணேசலிங்கம் யாழ்.போதனா வைத்தியசாலை வைத்தியர்களுக்கு உத்தரவு பிறப்பித்துள்ளார்.