உயர் பாதுகாப்பு வலயங்கள் இல்லை: யாழ். இராணுவக் கட்டளைத் தலைமையகம்

(கவிசுகி)

1995ஆம் ஆண்டு முதல் உயர் பாதுகாப்பு வலயமாக இருந்த விக்டோரியா வீதி பொதுமக்கள் பாவனைக்குத் திறந்துவிடப்பட்டதையடுத்து, யாழ். நகரில் இனி எந்த உயர் பாதுகாப்பு வலயமும் இல்லையென  யாழ். இராணுவக் கட்டளைத் தலைமையகம் நேற்றிரவு ஊடகங்களுக்கு விடுத்துள்ள அறிக்கையில்  தெரிவித்துள்ளது.

யாழ். அராலி, குருநகர், கொழும்புத்துறை, தனங்கிளப்பு மற்றும் பருத்தித்துறை ஆகிய பிரதேசங்களில் தம்வசமிருந்த அனைத்து இடங்களையும் இராணுவத்தினர் உரியவர்களிடம் கையளித்த நிலையில் அவற்றின் உரிமையாளர்கள் அங்கு குடியேறியுள்ளதாக  அந்த அறிக்கையில்  குறிப்பிட்டுள்ளது.

தெல்லிப்பழை உதவி அரசாங்க பிரிவின் கீழுள்ள குரும்பசிட்டி, வசாவிளான் தெற்கு, வலிகாமம் வடக்கு உதவி அரசாங்க பிரிவைச் சேர்ந்த இளவாலை வடக்கு, இளவாலை மேற்கு, வித்தகபுரம், வடமராட்சி வடக்கு, கிழக்குப் பகுதிகளைச் சேர்ந்த, குடத்தனை, குடத்தனை கரையூர், மணல்காடு, பொற்பதி, அம்பன், செம்பியன்பற்று வடக்கு, தெற்கு, மருதங்கேணி, வதிராயன், உடுத்துரை, ஆழியவளை ஆகிய இடங்களில் கண்ணிவெடிகள் அகற்றப்பட்டு மக்கள் அங்கு மிக விரைவில்  மீள்குடியேற்றம் செய்யப்படவுள்ளதாகவும் யாழ்ப்பாண இராணுவக் கட்டளைத் தலைமையகம் மேலும் தெரிவித்துள்ளது.