கஞ்சாவுடன் கைது செய்யப்பட்டவர்களுக்கு விளக்கமறியல்

-செல்வநாயகம் கபிலன்

யாழ்ப்பாணம், நெடுந்தீவுக் கடலில் 87 கிலோகிராம் கஞ்சாவுடன் கைது செய்யப்பட்ட இரண்டு சந்தேகநபர்களையும் எதிர்வரும் 28ஆம் திகதி வரையில் விளக்கமறியலில் வைக்குமாறு ஊர்காவற்றுறை நீதவான் செல்வநாயகம் லெனின்குமார் புதன்கிழமை (15) உத்தரவிட்டார்.

படகில் கஞ்சா கொண்டு வந்த இரண்டு சந்தேகநபர்களும் கடந்த 10ஆம் திகதி நெடுந்தீவுக் கடற்பரப்பில் இருந்து 6 கடல் மைல் தூரத்தில் கடற்படையினரால் கைது செய்யப்பட்டு, நெடுந்தீவு பொலிஸாரிடம் ஒப்படைக்கப்பட்டனர்.

ஊர்காவற்றுறை நீதிமன்ற அனுமதி பெற்று 96 மணித்தியாலங்கள் பொலிஸ் தடுப்புக் காவலில் வைத்து சந்தேகநபர்கள் விசாரணை செய்யப்பட்டனர். விசாரணை முடிவுற்றதும் சந்தேகநபர்கள் புதன்கிழமை (15) நீதிமன்றத்தில் ஆஜர்ப்படுத்தப்பட்டனர்.