மாடுகளை கடத்திய மூவர் கைது

-செல்வநாயகம் கபிலன்

அனுமதிப்பத்திரமின்றி பாரவூர்தியொன்றில் 5 மாடுகளைக் கொண்டுசென்ற மூன்று சந்தேகநபர்களை திங்கட்கிழமை (22) கைது செய்ததாக கொடிகாமம் பொலிஸ் நிலைய பொறுப்பதிகாரி டி.டிம்.ஷிந்தக என்.பண்டார தெரிவித்தார்.

கிளாலி பகுதியிலிருந்து சாவகச்சேரிக்கு மாடுகளைக் கொண்டு செல்லும் போது, பொலிஸார் பாரவூர்தியை மறித்துச் சோதனை செய்தனர். இதன்போது, சட்டவிரோதமாக மாடுகள் கொண்டு செல்லப்படுகின்றமை கண்டுபிடிக்கப்பட்டு பளை மற்றும் சாவகச்சேரி பகுதியை சேர்ந்த இருவர் கைது செய்யப்பட்டனர்.

பொலிஸாரின் ரோந்து நடவடிக்கையை கண்காணித்து மாடு கடத்துவதற்கு உதவிய மேலும் ஒருவரும் கைது செய்யப்பட்டார். மூவரிடமும் மேலதிக விசாரணைகளை மேற்கொண்டு சாவகச்சேரி நீதிமன்றத்தில் ஆஜர்ப்படுத்துவதற்கான நடவடிக்கைகளை மேற்கொண்டு வருவதாக பொறுப்பதிகாரி கூறினார்.