பிரம்படி படுகொலை நினைவேந்தல் நிகழ்வு

-செல்வநாயகம் ரவிசாந், எஸ்.நிதர்ஷன், எம்றொசாந்

யாழ்., கொக்குவில் - பிரம்படி படுகொலையின் 32 ஆவது ஆண்டு நினைவேந்தல் நிகழ்வு, இன்று (12) முற்பகல் மேற்படி பகுதியில் நடைபெற்றது.

பிரம்படி படுகொலை ஞாபகார்த்த நினைவேந்தல் குழுவும், படுகொலை செய்யப்பட்ட உறவுகளும் இணைந்து ஏற்பாடு செய்த குறித்த நினைவேந்தல் நிகழ்வில், கொக்குவில் - ஆடியபாதம் வீதியில் அமைந்துள்ள படுகொலை செய்யப்பட்ட ஐம்பதுக்கும் மேற்பட்ட பொதுமக்களுக்கான நினைவுத் தூபியடியில், ஈகைச் சுடரேற்றி மலர் மாலைகள் அணிவித்தும் மலர் தூவியும் அஞ்சலி செலுத்தப்பட்டது.

அதனைத் தொடர்ந்து நல்லூர் பிரதேச சபையின் தவிசாளர் த. தியாகமூர்த்தி நினைவுரையாற்றினார்.

தொடர்ந்து, கொக்குவில் சனசமூக  நிலைய முன்றலில் மேற்படி சனசமூக நிலையத்தின் செயலாளர் மு. ஈழத்தமிழ்மணி  தலைமையில் நடைபெற்ற நிகழ்வில்,  படுகொலை செய்யப்பட்டவர்களின் உறவுகள், தமிழ்த் தேசிய மக்கள் முன்னணியின் பொதுச் செயலாளர் செல்வராஜா கஜேந்திரன், தமிழ்த் தேசியப் பண்பாட்டுப் பேரவையின் தலைமை ஒருங்கிணைப்பாளர் எஸ். நிஷாந்தன் பலர் கலந்துகொண்டனர்.

இதேவேளை, புலனாய்வாளர்களின் அச்சுறுத்தல் காரணமாக நீண்ட காலமாக நடத்தப்படாதிருந்த கொக்குவில் - பிரம்படி படுகொலை நினைவேந்தல் நிகழ்வு, சுமார் 25 வருடங்களின் பின்னர் இன்றைய தினம் அனுஷ்டிக்கப்பட்டமை குறிப்பிடத்தக்கது.