-ச.சேகர்
கொழும்பு பங்குச்சந்தை கொடுக்கல் வாங்கல்களை பொறுத்தமட்டில் கடந்த வாரம் மொத்தப்புரள்வு பெறுமதி தொடர்ச்சியாக அதிகரித்த பெறுமதியை பதிவு செய்திருந்தது. ஆனாலும் கடந்த ஏழு வாரங்களாக தொடர்ச்சியாக உயர்வான பெறுமதியை பதிவு செய்திருந்த போக்கு சரிவை எதிர்நோக்கியிருந்தது. வெளிநாட்டு முதலீட்டாளர்கள் அதிகளவு பங்கு கொள்வனவில் கடந்த வாரம் தமது ஆர்வத்தை வெளிப்படுத்தியிருந்தனர்.
கடந்த வெள்ளிக்கிழமை பங்குச் சந்தை நடவடிக்கைகள் நிறைவடையும் பொழுது, அனைத்து பங்கு விலைச் சுட்டெண் 5,947.42 ஆகவும், S&P ஸ்ரீலங்கா 20 சுட்டி 3283.62 ஆகவும் அமைந்திருந்தன.
ஒக்டோபர் 07ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 3,292,715,605 அமைந்திருந்தது. கடந்த வாரம் மொத்தமாக 42,392 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 42,392 ஆகவும் வெளிநாட்டு கொடுக்கல் வாங்கல்கள் 1,151 ஆகவும் பதிவாகியிருந்தன.
திங்கட்கிழமை
ஆகக்குறைந்த மொத்தப்புரள்வு பெறுமதி பதிவுசெய்யப்பட்டிருந்த போதிலும், பிரதான சுட்டிகள் நேர்பெறுமதிகளை பதிவு செய்திருந்தன. சிலோன் டொபாக்கோ கம்பனி, ஜோன் கீல்ஸ் ஹோல்டிங்ஸ், லயன் பிரெவரி ஆகியன இதில் பங்களிப்பை வழங்கியிருந்தன. ஜோன் கீல்ஸ் ஹோல்டிங்ஸ் பங்குகளில் கைமாறல்களும், சந்திப்புகளும் இடம்பெற்றிருந்ததை அவதானிக்க முடிந்தது. மொத்தபுரள்வு பெறுமதியில் 49% பங்களிப்பை ஜோன் கீல்ஸ் ஹோல்டிங்ஸ் வழங்கியிருந்தது. டச்வுட் இன்வெஸ்ட்மன்ட்ஸ், கொலம்போ லான்ட் அன்ட் டிவலொப்மன்ட் மற்றும் HVA பூட்ஸ் ஆகியவற்றில் சிறியளவு முதலீட்டாளர்கள் அதிகளவு ஆர்வத்தை செலுத்தியிருந்தனர். வெளிநாட்டவர்கள் நிகர கொள்வனவாளர்களாக பதிவாகியிருந்தனர்.
செவ்வாய்க்கிழமை
சிலோன் டொபாக்கோ கம்பனியின் செயற்பாடுகளின் பங்களிப்புடன் கொழும்பு பங்குப்பரிவர்த்தனை நேர் பெறுமதியை பதிவு செய்திருந்தது. ஜோன் கீல்ஸ் ஹோல்டிங்ஸ் மற்றும் சிலோன் டொபாக்கோ கம்பனி ஆகிய பங்குகள் மீது மொத்த வியாபாரம் பதிவாகியிருந்தது. இவை இரண்டும் மொத்தப்புரள்வு பெறுமதியில் 34% பங்களிப்பை வழங்கியிருந்தன. நேஷன் லங்கா ஃபினான்ஸ் மற்றும் டோக்கியோ சீமெந்து ஆகியவற்றில் அதிகளவு ஆர்வம் காணப்பட்டதுடன், சிறியளவான முதலீட்டாளர்கள் டச்வுட் இன்வெஸ்ட்மன்ட்ஸ், HVA பூட்ஸ் மற்றும் FLC ஹோல்டிங்ஸ் ஆகியவற்றில் ஆர்வம் செலுத்தியிருந்தனர். வெளிநாட்டவர்கள் நிகர கொள்வனவாளர்களாக காணப்பட்டனர்.
புதன்கிழமை
அனைத்து பங்குவிலைச்சுட்டெண் நேர் பெறுமதியை பதிவு செய்து நிறைவடைந்திருந்த போதிலும், ஜோன் கீல்ஸ் ஹோல்டிங்ஸ் மற்றும் லயன் பிரெவரி ஆகிய பங்குகள் மீது விலைச்சரிவு காணப்பட்டமையால் சந்தையில் கலந்த போக்கு காணப்பட்டது. யுனைட்டட் மோட்டர்ஸ், கொமர்ஷல் வங்கி, ஜோன் கீல்ஸ் ஹோல்டிங்ஸ் மற்றும் சிலோன் டொபாக்கோ கம்பனி ஆகிய நிறுவனங்களின் பங்குகள் மீது அதிகளவு ஈடுபாடு காணப்பட்டது. டச்வுட் இன்வெஸ்ட்மன்ட்ஸ மற்றும் சுவர்ணமஹால் ஃபினான்சியல் சேர்விசஸ் ஆகிய பங்குகள் மீது சிறியளவிலான முதலீட்டாளர்கள் ஆர்வம் செலுத்தியிருந்தனர்.
வியாழக்கிழமை
தொடர்ச்சியான 7ஆவது நாளாக அனைத்து பங்கு விலைச்சுட்டெண் உயர்வான பெறுமதியை பதிவு செய்திருந்தது. இந்த மாதத்தில் அனைத்து பங்கு விலைச்சுட்டெண் மற்றும் S&P SL20 ஆகியன முறையே 154 மற்றும் 72 புள்ளிகளை உயர்வாக பதிவு செய்திருந்தன. சிலோன் டொபாக்கோ கம்பனி மற்றும் கார்சன்ஸ் கம்பர்பட்ச் ஆகிய நிறுவனங்களின் பங்குகளில் உயர்வான பெறுமதி பதிவாகியிருந்ததை தொடர்ந்து இரு பிரதான சுட்டிகளும் நேர் பெறுமதிகளை பதிவு செய்திருந்தன. ஜோன் கீல்ஸ் ஹோல்டிங்ஸ், ஹற்றன் நஷனல் வங்கி மற்றும் ஹேமாஸ் ஹோல்டிங்ஸ் ஆகிய நிறுவனங்களின் பங்குகள் மீது வெளிநாட்டவர்களின் ஈடுபாடு அதிகளவில் காணப்பட்டது. டச்வுட், ஆசியா அசெட் ஃபினான்ஸ் மற்றும் சுவர்ணமஹால் ஃபினான்சியல் சேர்விசஸ் ஆகிய நிறுவன பங்குகள் மீது சிறியளவான முதலீட்டாளர்களின் ஆர்வம் அதிகளவில் காணப்பட்டது.
வெள்ளிக்கிழமை
இந்த வாரம் சந்தை நடவடிக்கைகள் மொத்தப்புரள்வு பெறுமதி 1 பில்லியன் ரூபா பெறுமதியை கடந்ததுடன் நிறைவடைந்திருந்தது. ஏசியன் ஹோட்டல்ஸ் அன்ட் புரொப்பர்டீஸ், நெஸ்லே லங்கா, ட்ரான்ஸ் ஏசியா ஹோட்டல்ஸ் மற்றும் DFCC வங்கி ஆகிய பங்குகளின் விலைகளில் சரிவு ஏற்பட்டதை தொடர்ந்து பங்குச்சந்தை மறை பெறுமதிகளை பதிவு செய்திருந்தது. ஜோன் கீல்ஸ் ஹோல்டிங்ஸ், லோவ்ஸ் காஸ், ஹற்றன் நஷனல் வங்கி, அக்சஸ் என்ஜினியரிங் மற்றும் லங்கா ஐழுஊ ஆகியன சந்தையின் மொத்த புரள்வு பெறுமதியை 72 வீதத்தால் அதிகரிக்கச் செய்திருந்தது. சில்லறை விற்பனையாளர்கள் சந்தையில் அதிகளவு ஈடுபாட்டை காண்பிக்காததுடன், ஜோன் கீல்ஸ் ஹோல்டிங்ஸ் மற்றும் ஹற்றன் நஷனல் வங்கி ஆகிய பங்குகளில் வெளிநாட்டவர்களின் ஈடுபாடு அதிகம் காணப்பட்டது.
கடந்த வார கொடுக்கல் வாங்கல் நடவடிக்கைகளில் சுவர்ணமஹால் ஃபினான்ஸ், சொஃப்ட்லொஜிக் கெப்பிட்டல், என்வி றிசோர்சஸ் (உரிமை), லீ ஹெட்ஜஸ் மற்றும் த ஃ.பினான்ஸ் கம்பனி (சாதாரண) போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன.
லேக் ஹவுஸ் பிரின்டர்ஸ், பீசி ஹவுஸ், ஹியுஜே, செரண்டிப் லாண்ட் மற்றும் ஆசரி சென்ரல் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.
தங்கம் மற்றும் வெள்ளி விலை
கடந்த வாரம் 24 கெரட் தங்கத்தின் சராசரி விலை 45,500 ரூபாவாகவும், 22 கெரட் தங்கத்தின் விலை 42,000 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது.
நாணய மாற்று விகிதம்
கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 132.76 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 212.81 ஆக காணப்பட்டிருந்தது.
