பங்குச்சந்தை மற்றும் தங்கம், வெள்ளி விலை நிலைவரங்கள்

-ச.சேகர்

 

பங்குச்சந்தை கொடுக்கல் வாங்கல்கள் கடந்த வாரம் தொடர்ச்சியான சரிவான பெறுமதிகளை பதிவு செய்திருந்தது. கடந்த வெள்ளிக்கிழமை பங்குச் சந்தை நடவடிக்கைகள் நிறைவடையும் பொழுது, அனைத்து பங்கு விலைச் சுட்டெண் 5,855.34 ஆகவும், S&P ஸ்ரீலங்கா 20 சுட்டி 3232.50 ஆகவும் அமைந்திருந்தன.

 

நவம்பர் 04ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 3,538,187,056 அமைந்திருந்தது. கடந்த வாரம் மொத்தமாக 22,399 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 21,241 ஆகவும் வெளிநாட்டு கொடுக்கல் வாங்கல்கள் 1,158 ஆகவும் பதிவாகியிருந்தன.

 

திங்கட்கிழமை

வாரத்தின் முதல் நாள் கொடுக்கல் வாங்கல்கள் மறை பெறுமதியுடன் ஆரம்பித்திருந்தன. கொமர்ஷல் லீசிங் மற்றும் ஏசியன் ஹோட்டல்ஸ் அன்ட் புரொப்பர்டீஸ் போன்றன இந்த மறை பெறுமதிக்கு பங்களிப்பை வழங்கியிருந்தன. கொமர்ஷல் வங்கி மற்றும் ஜோன் கீல்ஸ் ஹோல்டிங்ஸ் பங்குகள் மீதான மொத்த வியாபாரம் மற்றும் எக்ஸ்போலங்கா ஹோல்டிங்ஸ் பங்குகளின் கைமாறல்களின் காரணமாக மொத்தப்புரள்வு பெறுமதி 400 மில்லியன் ரூபாவை விட அதிகரித்து பதிவாகியிருந்தது. மேலும், லங்கா ஒரிக்ஸ் லீசிங் கம்பனி பங்குகள் மீது வெளிநாட்டு முதலீட்டாளர்களின் ஆர்வம் காணப்பட்டது. சிறியளவிலான முதலீட்டாளர்கள் அதிகளவு ஆர்வத்;தை சென்ச்சரி இன்வெஸ்ட்மன்ட்ஸ் மற்றும் தங்கொடுவ போர்சலேன் பங்குகள் மீது வெளிப்படுத்தியிருந்தனர்.

 

செவ்வாய்க்கிழமை

புதிய மாதத்தில் பங்குச்சந்தை கொடுக்கல் வாங்கல்கள் தொடர்ந்தும் சரிவான பெறுமதிகளை பதிவு செய்திருந்தது. சிறியளவிலான பங்கு கொடுக்கல் வாங்கல்கள் மொத்தப்புரள்வு பெறுமதியில் அதிகளவு பங்களிப்பை வழங்கியிருந்தது. விசேடமாக PCH ஹோல்டிங்ஸ், டச்வுட் இன்வெஸ்ட்மன்ட்ஸ் மற்றும் ஒரியன் காமென்ட்ஸ் ஆகிய பங்குகள் பங்களிப்பை வழங்கியருந்தன. கொமர்ஷல் வங்கியின் மொத்த பங்கு விற்பனை, மொத்தப்புரள்வு பெறுமதியில் அதிகளவு பங்களிப்பை வழங்கியிருந்தது.

 

புதன்கிழமை

தொடர்ச்சியான இரண்டு தினங்களாக சந்தை நடவடிக்கைகள் மந்த கதியில் இடம்பெற்றிருந்ததை தொடர்ந்து, வெளிநாட்டவர்களின் கொள்வனவுகளின் மூலம் சந்தை ஆதிக்கம் காணப்பட்டது. மொத்தப்புரள்வு பெறுமதியின் 62.6 வீதத்தை இவர்கள் பங்களிப்பு செய்திருந்தனர். யுனைட்டட் மோட்டர்ஸ் மற்றும் எயிட்கன் ஸ்பென்ஸ் போன்ற பங்குகளில் அதிகளவு ஆர்வத்தை வெளிப்படுத்தியிருந்தனர். மேலும், மொத்தப்புரள்வு பெறுமதி 500 மில்லியன் ரூபாவை விட அதிகரித்து பதிவாகியிருந்தது. அக்சஸ் என்ஜினியரிங், சம்பத் வங்கி மற்றும் டோக்கியோ சீமெந்து ஆகிய பங்குகளின் மீதும் அதிகளவு ஈடுபாடு காணப்பட்டது. மேலும், டச்வுட் மற்றும் PCH ஹோல்டிங்ஸ் ஆகிய பங்குகள் மீது சிறியளவிலான முதலீட்டாளர்கள் அதிகளவு ஈடுபாட்டை காண்பித்திருந்தனர்

 

வியாழக்கிழமை

கொழும்பு பங்குச்சந்தையின் கொடுக்கல் வாங்கல்கள் நவம்பர் மாதத்தில் தொடர்ச்சியான ஐந்தாவது நாளாக சரிவுகளை பதிவு செய்திருந்தது. இதில் சிலோன் டொபாக்கோ கம்பனி பங்குகள் பெருமளவு பங்களிப்பை வழங்கியிருந்தன. சிலோன் டொபாக்கோ கம்பனி, நெஸ்லே லங்கா மற்றும் எக்ஸ்போலங்கா ஹோல்டிங்ஸ் பங்குகள் மொத்த விற்பனை, மொத்தப்புரள்வு பெறுமதியை அரை பில்லியன் பெறுமதியை எய்த பங்களிப்பு வழங்கியிருந்தது. சந்திப்புகள் மொத்தப்புரள்வு பெறுமதியின் 64 வீத பங்களிப்பை வழங்கியிருந்தன. மேலும், PC ஹவுஸ் மற்றும் டச்வுட் இன்வெஸ்ட்மன்ட்ஸ் பங்குகள் மீது தொடர்ச்சியான சிறியளவிலான முதலீட்டாளர்களின் ஆர்வம் நீடித்த வண்ணம் காணப்பட்டது.

 

வெள்ளிக்கிழமை

ஏசியன் ஹோட்டல்ஸ் அன்ட் புரொப்பர்டீஸ் மற்றும் சி ரி ஹோல்டிங்ஸ் பங்குகள் சந்திப்பை பதிவு செய்திருந்ததை அவதானிக்க முடிந்தது. இதன் காரணமாக மொத்தப்புரள்வு பெறுமதி 1.5 பில்லியன் பெறுமதியை விட அதிகரித்து பதிவாகியிருந்தது. மொத்தப்புரள்வு பெறுமதியில் 86 வீதமான பங்களிப்பை மொத்த வியாபாரங்கள் வழங்கியிருந்தன. வெளிநாட்டவர்கள் அதிகளவு விற்பனையில் ஈடுபட்டிருந்ததை அவதானிக்க முடிந்ததுடன், மேலே குறிப்பிட்ட பங்குகளை இவர்கள் விற்பனை செய்திருந்தனர். சிறியளவிலான முதலீட்டாளர்களின் கொடுக்கல் வாங்கல்கள் குறைந்தளவிலேயே இடம்பெற்றிருந்தன.

 

கடந்த வார கொடுக்கல் வாங்கல் நடவடிக்கைகளில் கலாமசூ, இன்டஸ்ரியல் ஏஎஸ்பிஎச், மடுல்சீமை, லங்கா வென்ச்சர்ஸ் மற்றும் செலிங்கோ இன்சூரன்ஸ் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

எஸ்எம்பி லீசிங்(சாதாரண), செரன்டிப் என்ஜி.குரூப், லங்கா சென்ச்சரி (உரிமை), சிலோன் லெதர் (உரிமை) மற்றும் போகல கிரபைட் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

 

தங்கம் மற்றும் வெள்ளி விலை 

கடந்த வாரம் 24 கெரட் தங்கத்தின் சராசரி விலை 44,800 ரூபாவாகவும், 22 கெரட் தங்கத்தின் விலை 41,000 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 132.72 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 214.27 ஆக காணப்பட்டிருந்தது.