பங்குச்சந்தை மற்றும் தங்கம், வெள்ளி விலை நிலைவரங்கள்

-ச.சேகர்

 

கடந்த ஆண்டு முழுவதும் பதிவாகியிருந்த பங்குச்சந்தை பதிவு செய்த மொத்த பெருமானத்தை நடப்பு ஆண்டின் முதல் 22 நாட்களில் கடந்திருந்தது. மொத்த வெளிநாட்டு கொள்வனவுகள் 1 பில்லியன் ரூபா பெறுமதியை கடந்திருந்தது. முதலீட்டாளர்களுக்கு அதிகளவு வருமானத்தை பெற்றுக் கொள்ளக்கூடிய மாற்று முதலீட்டு மூலமாக பங்குச்சந்தை அமைந்திருக்கும் எனும் கூற்றின் பிரதிபலிப்பு கடந்த வாரமும் பங்குச்சந்தையில் அவதானிக்க முடிந்தது. வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 6,255.63 ஆகவும், S&P ஸ்ரீலங்கா 20 சுட்டி 3478.09 ஆகவும் பதிவாகியிருந்தன.

 

ஜனவரி 20ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 5,812,511,828 அமைந்திருந்தது. கடந்த வாரம் மொத்தமாக 44,388 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 42,207 ஆகவும் வெளிநாட்டு கொடுக்கல் வாங்கல்கள் 2,181 ஆகவும் பதிவாகியிருந்தன.

 

திங்கட்கிழமை

ஜோன் கீல்ஸ், கார்சன்ஸ் கம்பபெட்ச் மற்றும் கொமர்ஷல் லீசிங் அன்ட் ஃபினான்ஸ் ஆகிய பங்குகள் மீதான ஈடுபாட்டின் காரணமாக, இந்த வாரம் நேர்த்தியான பெறுமதியில் ஆரம்பமாகிறது. ஆயினும், கடந்த ஐந்து நாட்களாக தொடர்ச்சியாக மொத்தப்புரள்வு பெறுமதி 1 பில்லியன் ரூபாவை கடந்திருந்த நிலையில், இன்றைய தினம் 600 மில்லியன் ரூபாவை மட்டுமே எய்தியிருந்தது. ஜோன் கீல்ஸ் ஹோல்டிங்ஸ், செவ்ரோன் லுப்ரிகன்ட்ஸ் பங்குகள் மீது மொத்த வியாபாரங்கள் பதிவாகியிருந்தன. வெளிநாட்டவர்கள் அதிகளவு பங்கு விற்பனையில் ஈடுபட்டிருந்தனர். லங்கா ஒரிக்ஸ் ஃபினான்ஸ் பங்குகள் அதிகளவு விற்பனையாகியிருந்தன. மேலும், யூனியன் வங்கி மற்றும் அக்சஸ் என்ஜினியரிங் பங்குகள் மீது கலப்பு பெறுமதிகள் பதிவாகியிருந்தன.

 

செவ்வாய்க்கிழமை

ஆரம்பத்தில் நேர்த்தியான பெறுமதிகளுடன் நடவடிக்கைகள் ஆரம்பித்திருந்த போதிலும், பிரதான சுட்டிகள் கலப்பு பெறுமதிகளை பதிவு செய்து நிறைவடைந்திருந்தது. மொத்த பங்குகள் பெருமளவில் கைமாறியிருந்த நிலையிலும், மொத்தப்புரள்வு பெறுமதி அரை பில்லியன் பெறுமதிக்கு குறைவாக நிறைவடைந்திருந்தது. ஜோன் கீல்ஸ் ஹோல்டிங்ஸ், கொமர்ஷல் வங்கி மற்றும் ஹேலீஸ் பங்குகளின் மீது அதிகளவு ஈடுபாடு காணப்பட்டது. இதேவேளை, சிறியளவிலான முதலீட்டாளர்கள் பெருமளவு எஸ்எம்பி லீசிங், பான்ஏசியன் பவர் மற்றும் ஏசியா அசெட் ஃபினான்ஸ் பங்குகள் மீது ஆர்வம் காண்பித்திருந்தனர்.   

 

புதன்கிழமை

கொழும்பு பங்குச்சந்தை கொடுக்கல் வாங்கல்கள் உயர்வடைந்து, பிரதான சுட்டி 6200 புள்ளிகளை கடந்திருந்தது. செவ்ரோன் லுப்ரிகன்ட்ஸ், கொமர்ஷல் வங்கி மற்றும் ஹேலீஸ் பங்குகள் மொத்தப்புரள்வு பெறுமதியின் 15 வீத பங்களிப்பை வழங்கியிருந்தன. வெளிநாட்டவர்கள் எக்ஸ்போலங்கா ஹோல்டிங்ஸ், கொமர்ஷல் வங்கி, டெக்ஸ்ச்சர்ட் ஜேர்சி பங்குகள் மீது அதிகளவு ஆர்வம் செலுத்தியிருந்ததுடன், ஜோன் கீல்ஸ் ஹோல்டிங்ஸ் பங்குகளை கொள்வனவு செய்வதிலும் ஆர்வம் செலுத்தியிருந்தனர். மேலும், நேஷன் லங்கா ஃபினான்ஸ், எஸ்எம்பி லீசிங் மற்றும் த ஃபினான்ஸ் கம்பனி வாக்குரிமையற்ற பங்குகளின் மீது அதிகளவு நாட்டம் காணப்பட்டது.

 

வியாழக்கிழமை

கொமர்ஷல் வங்கி போன்ற பங்குகள் மீது அதிகளவு உயர்ந்த பெறுமதிகள் பதிவாகியிருந்ததன் காரணமாக, பங்குச்சந்தை தொடர்ந்தும் உயர்வடைந்திருந்தது. சில பங்குகள் சந்திப்புகளை பதிவு செய்திருந்தமையின் காரணமாக சந்தை புரள்வு பெறுமதி 1.8 பில்லியனை கடந்து நிறைவடைந்திருந்தது. கொமர்ஷல் வங்கி, லங்கா ஐஓசி மற்றும் ஜோன் கீல்ஸ் ஹோல்டிங்ஸ் ஆகிய பங்குகள் மீது குறிப்பிடத்தக்களவு வெளிநாட்டவர்கள் ஆர்வத்தை செலுத்தியிருந்தனர். ஜோன் கீல்ஸ் ஹோல்டிங்ஸ் வொரன்ட் 22 பங்குகள் மீது அதிகளவு ஈடுபாடு காணப்பட்டது.

 

வெள்ளிக்கிழமை

சிலோன் டொபாக்கோ கம்பனி, டயலொக் ஆக்சியாடா மற்றும் சிரி ஹோல்டிங்ஸ் போன்ற பங்குகள் உயர்ந்த பெறுமதிகளை பதிவு செய்திருந்ததுடன், சந்தை உயர்வான பெறுமதிகளை பதிவு செய்திருந்தது. பங்குச்சந்தை தொடர்ந்தும் உயர்வடைந்திருந்தது. எயிட்கன் ஸ்பென்ஸ், கொமர்ஷல் வங்கி மற்றும் லங்கா IOC ஆகிய பங்குகள் மொத்தப்புரள்வு பெறுமதியில் 32% பங்களிப்பை வழங்கியிருந்தன. டெஸ் அக்ரோ, ஏசியா அசெட் ஃபினான்ஸ் மற்றும் பீபிள்ஸ் மேர்ச்சன்ட் ஃபினான்ஸ் ஆகிய பங்குகள் மீது அதிகளவு ஈடுபாடு காணப்பட்டதுடன், ஓவர்சீஸ் ரியல்டி, எஸ்எம்பி லீசிங், பான்ஏசியன் பவர் மற்றும் பிரவுண்ஸ் இன்வெஸ்ட்மன்ட்ஸ் ஆகியன உயர்ந்த பெறுமதிகளை பதிவு செய்திருந்தன.

 

கடந்த வார கொடுக்கல் வாங்கல் நடவடிக்கைகளில் எஸ்எம்பி லீசிங், எஸ்எம்பி லீசிங் (வாக்குரிமையற்ற), செரண்டிப் லான்ட், ட்ரேட் ஃபினான்ஸ், மற்றும் பீபிள்ஸ் மேர்ச். போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

லங்கா சென்ச்சரி(உரிமை), செலின்சிங். பிசி ஹவுஸ், ஹரிஸ்சந்திரா மற்றும் ஷலிமர் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

தங்கம் மற்றும் வெள்ளி விலை 

கடந்த வாரம் 24 கெரட் தங்கத்தின் சராசரி விலை 45,600 ரூபாவாகவும், 22 கெரட் தங்கத்தின் விலை 42,000 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 132.23 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 220.50 ஆக காணப்பட்டிருந்தது.