விபத்தில் குடும்பஸ்தர் பலி

-எஸ்.றொசேரியன் லெம்பேட்

மன்னார் தள்ளாடி சந்தியில் இருந்து வங்காலைக்குச் செல்லும் பிரதான வீதியில் நேற்று வெள்ளிக்கிழமை (05)  மாலை இடம்பெற்ற விபத்தில், 55 வயது மதிக்கத்தக்க குடும்பஸ்தர் சம்பவ இடத்திலேயே உயிரிழந்துள்ளதாக மன்னார் பொலிஸார் தெரிவித்தனர்.

சிறுநாவற்குளம் கிராமத்தைச் சேர்ந்த குறித்த நபர் வங்காலை பகுதியில் மாடு மேய்த்து விட்டு, தள்ளாடி பிரதான வீதியூடாக சைக்கிளில் சென்று கொண்டிருந்த போது அவருக்கு பின்னால் வேகமாக வந்து கொண்டிருந்த கெப் ரக வாகனம் மோதியதில் அவர் சம்பவ இடத்திலேயே உயிரிழந்துள்ளார்.

அவ்வீதியால் பயணித்தவர்களின் உதவியுடன் குறித்த சடலம் மன்னார் வைத்தியசாலைக்கு கொண்டு செல்லப்பட்டது.

மன்னார் பொலிஸ் நிலைய பொறுப்பதிகாரி அஜந்த றொட்றிக்கோ உற்பட பொலிஸார் சம்பவ இடத்துக்கு வருகை தந்து விசாரனைகளை மேற்கொண்டனர்.

கெப் ரக வாகனத்தின் சாரதியையும் மன்னார் பொலிஸார் கைது செய்துள்ளதோடு மேலதிக விசாரணைகளையும் மேற்கொண்டு வருகின்றனர்.