‘குடிநீர்ப் பிரச்சினைகளுக்கு நிரந்தரத் தீர்வு வேண்டும்’

-நடராசா கிருஸ்ணகுமார்

முல்லைத்தீவு மாவட்டத்தில், 30க்கும் மேற்பட்ட பாடசாலைகளில் ஏற்பட்டுள்ள குடிநீர்ப் பிரச்சினைகளுக்கு நிரந்தரத் தீர்வுகள் காணப்பட வேண்டும் என பெற்றோர்கள் வலயக் கல்விப் பணிமனையிடம் தொடர்ச்சியாக முறைப்பாடுகள் செய்து வருகின்றனர்.

முல்லைத்தீவு மாவட்டத்தில், இரு கல்வி வலயங்கள் இயங்குகின்றன. முல்லைத்தீவு கல்வி வலயத்தில் 65 பாடசாலைகளும் துணுக்காய் கல்வி வலயத்தில் 60 பாடசாலைகளும் இயங்குகின்றன.

ஜூன், ஜூலை மாதங்களில் பாடசாலைகளில் குடிநீர் நெருக்கடி ஆண்டு தோறும் காணப்படுவதால், மாணவர்கள் பாதிக்கப்படுவதுடன் நோய்த்தாக்கத்துக்கும் உட்படுகின்ற சம்பவங்கள் அதிகரித்துச் செல்கின்றன.

பாடசாலைகளுக்குச் செல்கின்ற சுகாதாரத் திணைக்கள அதிகாரிகள் சுத்தமான குடிநீரை மாணவர்கள் அருந்த வேண்டும் என விழிப்புணர்வுகள் மேற்கொள்ளப்படுகின்ற போதிலும், பாடசாலைகளில் குடிநீர் கூட இல்லாத நிலைமை காணப்படுகின்றது.

இதன் காரணமாக மாணவர்களின் பற்கள் கூட பாதிக்கப்படுவதாகத் தெரிவிக்கப்படுகின்றது. எனவே, வலயக் கல்விப் பணிமனைகள் மாணவர்களின் நலன் கருதி சிறந்த குடிநீர்த் திட்டத்தை பாடசாலைகளில் ஏற்படுத்த வேண்டும் என பெற்றோர்கள் கோரிக்கை விடுத்துள்ளனர்.