புயலால் பாதிக்கப்பட்டவர்களுக்கு இழப்பீடு

-செ.கீதாஞ்சன்

முல்லைத்தீவு மாவட்டத்தில் புயலால் பாதிக்கப்பட்ட மக்களுக்கு முதற்கட்ட இழப்பீடு வழங்கி வைக்கப்படவுள்ளது.

முல்லைத்தீவு மாவட்டத்தில் இந்த மாதம் ஏற்பட்ட இயற்கை அனர்த்தம் புயல் தாக்கத்தால் 25 வீடுகள் சேதமடைந்துள்ளன.

கரைதுறைப்பற்று பிரதேசத்தில் 3 வீடுகளும், ஒட்டுசுட்டான் பிரதேசத்தில் 22 வீடுகளும் புயல்காற்றால் சேதமடைந்துள்ளன. இந்த அனர்த்தம் தொடர்பில் கிராம சேவகர்கள் ஊடாக பிரதேச செயலக அதிகாரிகளாலும் முல்லைத்தீவு மாவட்ட அனர்த்த முகாமைத்து மத்திய நிலைய அதிகாரிகளும் நேரில் சென்று பார்வையிட்டு  அழிவு தொடர்பான திட்டமிடல் அதிகாரிகளால் பதிவுகள் மேற்கொள்ளப்பட்டன.

இந்நிலையில், 25 குடும்பங்களுக்கும் முதற்கட்டமாக தலா பத்தாயிரம் ரூபாய் நிதி தேசிய அனர்த்த முகாமைத்துவ நிவாரண சேவை நிலையத்தால் ஒதுக்கப்பட்டுள்ளதாக, முல்லைத்தீவு மாவட்ட அனர்த்த முகாமைத்துவ நிலைய அதிகாரிகள் தெரிவித்துள்ளார்கள்.

இவர்களுக்கான குறித்த நிதி ஒதுக்கீடு விரைவில் பயனாளிகளுக்கு கையளிக்கப்படவுள்ளதாகவும் தெரிவித்துள்ளார்கள்.