அம்மாவானார் ஐஸ்வர்யா ராய்

முன்னாள் உலக அழகியும் இந்தியாவின் முன்னிலை திரைப்பட நடிகைகளில் ஒருவருமான ஐஸ்வர்யா ராய் இன்று தாயாகியுள்ளார்.

ஐஸ்வர்யா இன்று பெண் குழந்தையொன்றை பெற்றதாக அவரின் கணவர் அபிஷேக் பச்சன் அறிவித்துள்ளார்.

38 வயதான  ஐஸ்வர்யா, மும்பை செவன்ஸ் ஹில் வைத்தியசாலையில் தங்கியிருந்தார். இன்று அதிகாலை 4 மணியளவில் அவருக்குப் பிரசவ வலி ஏற்பட்டதையடுத்து அவர் பிரசர அறைக்கு அழைத்துச் செல்லப்பட்டார். சுமார் 6 மணித்தியாலங்களின்பின் அவருக்கு பெண் குழந்தை பிறந்தது.

தான் தாத்தாவாகியமை குறித்து பொலிவூட் சூப்பர்ஸ்டார் அமிதாப் பச்சனும் மகிழ்ச்சி தெரிவித்துள்ளார்.

"நான் அழகான பெண் குழந்தைக்கு தாத்தாவாகிவிட்டேன். ஒரு தாத்தா பரவசமடைந்துள்ளார்" என ட்விட்டரில் தெரிவித்தார் அமிதாப்.

1994 ஆம் ஆண்டு தனது 21 ஆவது வயதில் உலக அழகியான ஐஸ்வர்யா ராய் 2007 ஆம் ஆண்டு அபிஷேக் பச்சனை திருமணம் செய்தார்.

 ஐஸ்வர்யா ராய்க்கு வயிற்றில் நோயொன்று இருப்பதால் அவரால் கருத்தரிக்க முடியாதுள்ளதாக வதந்தி பரவியது. இதற்கு அவரின் மாமனரான அமிதாப் பச்சன் கடும் கண்டனம் தெரிவித்திருந்தமை குறிப்பிடத்தக்கது.

ஐஸ்வர்யா 11.11.11 ஆம் திகதி குழந்தை பெறுவாரா இல்லையா என்பது குறித்து 150 கோடி இந்திய ரூபாவுக்கு சூதாட்டம் இடம்பெற்றதாக சூதாட்ட முகவர்கள் தெரிவித்திருந்தனர்.