ஷேன் வோர்னுக்கு வெண்கலச் சிலை

அவுஸ்திரேலிய கிரிக்கெட் அணியின் முன்னாள் சுழற்பந்துவீச்சு நட்சத்திரமான ஷேன் வோர்னின் வெண்கலச் சிலையொன்று மெர்போர்ன் கிரிக்கெட் அரங்கிற்கு வெளியே திறந்துவைக்கப்பட்டுள்ளது.

லூயிஸ் லோமென் என்பவர் வடிவமைத்த இச்சிலை, லெக் ஸ்பின் பந்துவீசத் தயாராகும் வோர்னின் சாயலில் உள்ளது. இன்று வியாழக்கிழமை நடைபெற்ற இச்சிலையின் திறப்பு விழாவில் ஷேன்வோர்னும் பங்குபற்றினார்.

'இச்சிலை ஒரு லெக் ஸ்பின்னரரைப் போன்று உள்ளது. எனவே டெரில் (குல்லினன்- தென்னாபிரிக்க கிரிக்கெட் வீரர்) இதற்கு முகம் கொடுக்க சிரமப்படுவார்' என ஷேன் வோர்ன் வேடிக்கையாகக் கூறினார்.

ஷேன் வோர்னின் காதலியான நடிகை லிஸ் ஹர்லி, அவரின் பெற்றோர், ஷேன் வோர்னின் முன்னாள் மனைவி சிமோன் கல்லஹன் மூலம் பிறந்த மகள்கள் புரூக் (13), சம்மர் (9) மகன் ஜக்ஸன் (11) ஹர்லியின் மகன் டேமியன் (9) ஷேனின் சகோதரர் ஜேஸன் ஆகியோரும் இந்நிகழ்வில் கலந்துகொண்டனர்.