இந்தியன் வெல்ஸ்: அரையிறுதியில் செரினா, ரட்வன்ஸ்கா

இடம்பெற்றுவரும் பி.என்.பி பரிபஸ் பகிரங்க டென்னிஸ் தொடரின் (இந்தியன் வெல்ஸ்) பெண்கள் பிரிவின் அரையிறுதிச் சுற்றுக்கு செரினா வில்லியம்ஸ், அக்னியஸ்கா ரட்வன்ஸ்கா ஆகியோர் தகுதி பெற்றதோடு, ஆண்கள் பிரிவின் காலிறுதிச் சுற்றுக்கு நொவக் ஜோக்கோவிக், ரஃபேல் நடால், கெய் நிஷிகோரி, ஜோ-வில்பிரட் சொங்கா ஆகியோர் தகுதி பெற்றுள்ளனர்.

பெண்களின் காலிறுதிச் சுற்றுப் போட்டிகளில், உலகின் முதல் நிலை வீராங்கனையான செரினா வில்லியம்ஸ், 6-4, 6-3 என்ற செட் கணக்கில் உலகின் ஐந்தாம் நிலை வீராங்கனையான றோமானியாவின் சிமோனா ஹலெப்பை தோற்கடித்ததுடன், உலகின் மூன்றாம் நிலை வீராங்கனையான போலந்தின் அக்னியஸ்கா ரட்வன்ஸ்கா, 6-2, 7-6 என்ற செட் கணக்கில் உலகின் ஒன்பதாம் நிலை வீராங்கனையான செக்.குடியரசின் பெட்ரா குவிற்றோவாவை தோற்கடித்தார்.

ஆண்களின் நான்காம் சுற்றுப் போட்டிகளில், உலகின் முதல் நிலை வீரரான சேர்பியாவின் நொவக் ஜோக்கோவிச், 6-3, 6-3 என்ற செட் கணக்கில் ஸ்பெய்னின் பெலிசியனோ லொப்ஸியை தோற்கடித்ததுடன், உலகின் ஐந்தாம் நிலை வீரரான ஸ்பெய்னின் ரஃபேல் நடால், 6-7, 6-0, 7-5 என்ற செட் கணக்கில் ஜெர்மனியின் அலெக்ஸான்டர் சுவேரிவ்வை தோற்கடித்ததுடன், உலகின் ஆறாம் நிலை வீரரான ஜப்பானின் கெய் நிஷிகோரி, 1-6, 7-6, 7-6 என்ற செட் கணக்கில் தரவரிசையில் 11ஆம் இடத்திலுள்ள ஐக்கிய அமெரிக்காவின் ஜோன் இஸ்னரை தோற்கடித்ததுடன்,  உலகின் ஒன்பதாம் நிலை வீரரான பிரான்ஸின் ஜோ-வில்பிரைட் சொங்கா, 6-3, 6-2 என்ற செட் கணக்கில் ஒஸ்திரியாவின் டொமினிக் தெய்மை தோற்கடித்தார்.

இதேவேளை, உலகின் நான்காம் நிலை வீரரான சுவிற்ஸர்லாந்தின் ஸ்டியான் வொர்விங்கா, 6-3, 5-7, 7-6 என்ற செட் கணக்கில் பெல்ஜியத்தின் டேவிட் கொஃபினிடம் தோல்வியைத் தழுவினார்.