பாகிஸ்தானின் காஷ்மீரில் சீன இராணுவம் குவிக்கப்பட்டுள்ளதாக இந்தியா கூறுகிறது

பாகிஸ்தான் கட்டுப்பாட்டிலுள்ள காஷ்மீரில், சீனா இராணுவத்தை குவித்து வருவதாக தெரிவிக்கப்படுவது தொடர்பில், இந்தியப் பிரதமர் மன்மோகன் சிங் பாதுகாப்புத்துறை அதிகாரிகளுடன் அவசர ஆலோசனையொன்றை நடத்தியுள்ளார்.

மத்திய பாதுகாப்புத்துறை அமைச்சர் ஏ.கே.அந்தோணி, மத்திய உள்துறை அமைச்சர் ப.சிதம்பரம், சீனாவுக்கான இந்தியத் தூதர் சி.ஜெய்சங்கர் ஆகியோர் இந்தக் கூட்டத்தில் கலந்து கொண்டதாகவும் தெரிவிக்கப்படுகிறது.

பாகிஸ்தான் கட்டுப்பாட்டிலுள்ள காஷ்மீரில் சீனா தனது 11,000 இராணுவ வீரர்களை குவித்துள்ளமை மற்றும் ஏவுகணை நிலை நிறுத்தியிருப்பது ஆகியன குறித்து ஆலோசிக்கப்பட்டதாகவும் குறிப்பிடப்படுகிறது. அத்துடன், சீனாவின் ஆயுத குவிப்பு தொடர்பாக எல்லையில் ஆய்வு மேற்கொள்ளவும்  இந்தக் கூட்டத்தில் தீர்மானிக்கப்பட்டது.

இந்திய இறையாண்மைக்கு எதிரான நடவடிக்கைகளை நிறுத்திக்கொள்ளும்படி, சீன அரசுக்கு முறைப்படி தகவல் தெரிவிக்க வேண்டும் என கூட்டத்தில் வலியுறுத்தப்பட்டதுடன், மேலும் இந்திய உயர் இராணுவ அதிகாரிக்கு விசா வழங்க மறுத்த விவகாரம் மற்றும் அண்மைக்காலமாக இந்திய பெருங்கடல் பகுதியில் சீனா அதிக அக்கறை காட்டுவது தொடர்பிலும் கலந்தாலோசிக்கப்படது.

இதேவேளை,  பாகிஸ்தான் கட்டுப்பாட்டிலுள்ள காஷ்மீரில், சீனா இராணுவத்தை குவித்து வருவதாக தெரிவிக்கப்படுவதை பாகிஸ்தான் வெளிவிவகார அமைச்சு மறுத்துள்ளது.