இராஜினாமா செய்தார் கியஸ்டன் நீல்சன்

ஐக்கிய அமெரிக்க ஜனாதிபதி டொனால்ட் ட்ரம்பின் விமர்சனத்துக்குள்ளான குடியேற்றக் கொள்கைகளை நடைமுறைப்படுத்திய அந்நாட்டின் உள்நாட்டு பாதுகாப்புச் செயலாளர் கியஸ்டன் நீல்சன், தனது பதவியிலிருந்து 16 மாதங்களில் நேற்று முன்தினம் இராஜினாமா செய்துள்ளார்.

மெக்ஸிக்கோவுடனான ஐக்கிய அமெரிக்க எல்லையில் அகதிகளின் எண்ணிக்கை அதிகரிப்பொன்றுக்கு மத்தியிலேயே கியஸ்டன் நீல்சன் தனது பதவியிலிருந்து இராஜினாமா செய்துள்ளார்.

இந்நிலையில், கியஸ்டன் நீல்சனின் இராஜினாமாவை ஜனாதிபதி ட்ரம்ப் கோரியதாகவும், அவர் அளித்ததாகவும் சிரேஷ்ட நிர்வாக அதிகாரியொருவர் தெரிவித்துள்ளார்.

அந்தவகையில், ஐக்கிய அமெரிக்காவின் தற்போதைய சுங்கம், எல்லைப் பாதுகாப்பு ஆணையாளர் கெவின் மக்அலீனன், உள்நாட்டு பாதுகாப்புத் திணைக்களத்தில் நடப்பு செயலாளராவார் என டுவீட்டொன்றில் ஜனாதிபதி ட்ரம்ப் தெரிவித்துள்ளார்.

இந்நிலையில், நாளை வரை பதவியில் இருப்பேன் என கியஸ்டன் நீல்சன் நேற்று முன்தினமிரவு டுவீட்டொன்றில் கூறியுள்ளார்.