தவெக தலைவர் விஜய் பெரம்பூர் மற்றும் திருச்சி கிழக்கு ஆகிய இரு தொகுதிகளில் வெற்றி பெறும் பட்சத்தில், ஒரு தொகுதியில் பதவியை ராஜினாமா செய்ய வேண்டிய சூழல் நேரிடும். இதனால் விஜய்யின் இடத்தில் நடிகை திரிஷா போட்டியிட வாய்ப்பு உள்ளதாக பேச்சுகள் எழுந்துள்ளன. அதற்கேற்ப தவெக முன்னிலையில் இருக்கும் போது, நடிகை திரிஷாவும் விஜய்யின் வீட்டிற்கு நேரில் வந்துள்ளார்.

தமிழக சட்டசபைத் தேர்தலில் பதிவான வாக்குகள் எண்ணப்பட்டு வருகிறது. இதுவடை சுமார் 46% வாக்குகள் எண்ணப்பட்டுள்ளன. மதியம் 1 மணி நிலவரப்படி தவெக 104 தொகுதிகளிலும், திமுக 68 தொகுதிகளிலும், அதிமுக 62 தொகுதிகளிலும் முன்னிலையில் இருக்கின்றன. சென்னை, நெல்லை, தூத்துக்குடி, மதுரை, திருவள்ளூர், செங்கல்பட்டு உள்ளிட்ட மாவட்டங்களில் தவெக மிகப்பெரிய வெற்றியை நோக்கி செல்கிறது.

அதேபோல் தவெக தலைவர் விஜய் போட்டியிட்ட பெரம்பூர் மற்றும் திருச்சி கிழக்கு ஆகிய இரு தொகுதிகளிலும் முன்னிலையில் இருக்கிறார். பெரம்பூர் தொகுதியில் விஜய் 45,917 வாக்குகள் பெற்று முன்னிலையில் இருக்கிறார். இவரை எதிர்த்து போட்டியிட்ட திமுக வேட்பாளர் ஆர்டி சேகர் 26,817 வாக்குகளை பெற்று 2வது இடத்தில் இருக்கிறார்.

திருச்சி கிழக்கு தொகுதியில் விஜய் 32,792 வாக்குகளை பெற்று முன்னிலையில் உள்ளார். திமுக வேட்பாளர் இனிகோ இருதயராஜ் 20,777 வாக்குகள் பெற்று பின்னடைவை சந்தித்துள்ளார். இதே டிரெண்ட் தொடரும் பட்சத்தில் விஜய் இந்த இரு தொகுதியிலும் வெல்லக் கூடும் என்று பார்க்கப்படுகிறது. அப்படி வெற்றி பெற்றால், விஜய் ஒரு தொகுதியில் தனது பதவியை ராஜினாமா செய்ய வேண்டிய சூழல் ஏற்படும்.

பெரும்பாலும் விஜய் திருச்சி கிழக்கு தொகுதியில் எம்எல்ஏ பதவியை ராஜினாமா செய்வார் என்று கருதப்படுகிறது. அப்படி ராஜினாமா செய்தால், அடுத்த 6 மாதங்களில் இடைத்தேர்தல் வரும். இந்த இடைத்தேர்தலில் விஜய்யின் இடத்தில் நடிகை திரிஷா போட்டியிடக் கூடும் என்று கருதப்படுகிறது. தனக்கு அரசியலில் ஆர்வம் இருக்கிறது என்பதை நடிகை திரிஷா நீண்ட காலமாகவே சொல்லி வருகிறார்.