ஐ.நா. நிபுணர்குழு அறிக்கை மனித உரிமை பேரவைக்கு அனுப்பப்பட்டது

தமிழீழ விடுதலைப் புலிகளுக்கு எதிரான நடவடிக்கையில் இலங்கைப் படையினர் பல்லாயிரக்கணக்கான பொதுமக்களை கொலைசெய்ததாக குற்றம் சுமத்தும்; அறிக்கையொன்றை  ஐ.நா. செயலாளர் நாயகம் பான் கீ மூன், ஐ.நா. மனித உரிமைகள் பேரவைக்கு நேற்று திங்கட்கிழமை அனுப்பிவைத்துள்ளார்.

இக்கொலைக் குற்றச்சாட்டு விசாரணை மேற்கொள்ளுமாறு தன்னால் தனியாக உத்தரவிட முடியாதெனவும் பான் கீ மூன் கூறினார். இருப்பினும் மனித உரிமைகள் பேரவை போன்ற அமைப்புக்கள் இதனை மேற்கொள்ளமுடியுமெனவும் அவர் குறிப்பிட்டுள்ளார். ஆனால் யுத்தக் குற்றச்செயல்கள் எதுவும் இடம்பெறவில்லையென இலங்கை அரசாங்கம் மறுத்துள்ளது.

மனித உரிமைகள் பேரவை மற்றும் மனித உரிமைகளுக்கான ஐ.நா.வின் உயர்ஸ்தானிகருக்கும் குறித்த அறிக்கை அனுப்பிவைக்கப்பட்டுள்ளதாக ஐ.நா.வின் பேச்சாளர் மார்ட்டின் நெசக்கி தெரிவித்துள்ளார்.

2009ஆம் ஆண்டு தமிழீழ விடுதலைப் புலிகளுக்கு  எதிராக இடம்பெற்ற மோதலின்போது இலங்கைப் படையினர் பல்லாயிரக்கணக்கான பொதுமக்களை கொன்றதாக பான் கீ மூனினால் கடந்த ஏப்ரல் மாதம் நியமிக்கப்பட்ட நிபுணர் குழு கூறியது.  இருப்பினும் இரு தரப்பினரும் யுத்தக் குற்றச்செயல்களில் ஈடுபட்டிருக்கலாமெனவும் அக்குழு தெரிவித்திருந்தது. (DM)