இரு வர்த்தக நிலையங்களில் துணிகரக் கொள்ளை

திருகோணமலை, அனுராதபுர சந்தி பகுதியில் நேற்று (06) அதிகாலை இடம்பெற்ற கொள்ளைச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

நேற்று அதிகாலை சுமார் 2:30 மணியளவில், மர்ம நபர் ஒருவர் அனுராதபுர சந்தி பகுதியில் உள்ள இரண்டு வர்த்தக நிலையங்களின் பூட்டுகளை உடைத்து உள்ளே புகுந்துள்ளார்.

அங்கிருந்த பணம் மற்றும் பெறுமதிமிக்க பொருட்களைக் கொள்ளையடித்துக் கொண்டு அவர் தப்பிச் சென்றுள்ளதாகத் தெரிவிக்கப்படுகிறது.

கொள்ளையன் முகத்தை மறைத்தவாறு வர்த்தக நிலையங்களுக்குள் நுழையும் காட்சிகள் மற்றும் அங்கிருந்த பொருட்களைத் திருடும் காட்சிகள் அங்கு பொருத்தப்பட்டிருந்த சிசிடிவி (CCTV) கமராக்களில் தெளிவாகப் பதிவாகியுள்ளன. இந்தக் காணொளி தற்போது சமூக வலைதளங்களில் வெளியாகி மக்கள் மத்தியில் விழிப்புணர்வை ஏற்படுத்தியுள்ளது.

இச்சம்பவம் தொடர்பாகத் திருகோணமலை பொலிஸார் தீவிர விசாரணைகளை ஆரம்பித்துள்ளனர். சிசிடிவி ஆதாரங்களின் அடிப்படையில் சந்தேகநபரை அடையாளம் காணும் பணிகள் முன்னெடுக்கப்பட்டு வருவதாகவும், விரைவில் அவர் கைது செய்யப்படுவார் என்றும் பொலிஸார் தெரிவித்துள்ளனர்.

இந்தக் கொள்ளைச் சம்பவம் தொடர்பில் ஏதேனும் தகவல்கள் தெரிந்தால், உடனடியாக அருகிலுள்ள பொலிஸ் நிலையத்திற்குத் தகவல் வழங்குமாறு பொதுமக்கள் கேட்டுக்கொள்ளப்படுகிறார்கள்.

அத்துடன், வர்த்தக நிலையங்களின் உரிமையாளர்கள் தமது கடைகளின் பாதுகாப்பு வசதிகள் மற்றும் கண்காணிப்புக் கமராக்களின் செயற்பாடுகளைத் தொடர்ச்சியாக உறுதிப்படுத்திக் கொள்ளுமாறும் அறிவுறுத்தப்பட்டுள்ளனர்.