மதுபான நிலையம் சுற்றிவளைப்பு; 12 பேர் கைது

ரீ.எல்.ஜவ்பர்கான்

சட்டவிரோதமான முறையில் நடத்தப்பட்டு வந்த மதுபான உற்பத்தி நிலையமொன்று, திருகோணமலை - வெருகல் கிராமத்தில், நேற்று (16) திடீரென சுற்றிவளைக்கப்பட்டபோது, 12 பேர் கைது செய்யப்பட்டுள்ளனர்.

மதுவரித் திணைக்கள கிழக்கு மாகாண உதவி ஆணையாளர் எஸ்.தர்மசீலன் தலைமையில், திருகோணமலை மதுவரித் திணைக்கள அதிகாரிகளால் இந்த சுற்றிவளைப்பு மேற்கொள்ளப்பட்டது.

அங்கிருந்து 60,000 மில்லிலீற்றர் கோடா, 5,600 மில்லிலீற்றர் கசிப்பு, 3,000 மில்லிலீற்றர் கள்ளு என்பன கைப்பற்றப்பட்டுள்ளதுடன், கசிப்புத் தயாரிப்பதற்குப் பயன்படுத்தப்படும் உபகரங்களும் பெருமளவில் கைப்பற்றப்பட்டுள்ளன.