கண்ணீர் மல்க அஞ்சலி…

  பேரின்பராஜா சபேஷ்  

  உயிர்த்த ஞாயிறு கொடூரத் தாக்குதல் நடத்தப்பட்டு ஏழு ஆண்டுகள் நிறைவடைவதை முன்னிட்டு, இன்று செவ்வாய்க்கிழமை (21) மட்டக்களப்பு நகரின் பல்வேறு இடங்களில் உணர்வுப்பூர்வமான நினைவேந்தல் நிகழ்வுகள் நடைபெற்றன.

மாநகர சபை சார்பில் அஞ்சலி

மட்டக்களப்பு மாநகர முதல்வர் சிவம் பாக்கியநாதன் தலைமையில், காந்தி பூங்கா முன்றலில் அமைந்துள்ள நினைவுத் தூபியில் அஞ்சலி நிகழ்வு நடைபெற்றது. இதன்போது, தாக்குதலில் உயிர்நீத்த உறவுகளை நினைவுகூர்ந்து ஈகைச் சுடர் ஏற்றப்பட்டு, மலரஞ்சலி செலுத்தப்பட்டது.

கல்லடியில் நினைவேந்தல்

கிழக்கு சமூக அபிவிருத்தி மையத்தின் (ESDF) ஏற்பாட்டில், மட்டக்களப்பு கல்லடி பாலத்திற்கு அருகாமையில் அமைந்துள்ள நினைவுத் தூபியில் மற்றுமொரு நினைவேந்தல் நிகழ்வு நடைபெற்றது. இதில் சமூக ஆர்வலர்கள், உயிரிழந்தவர்களின் உறவினர்கள் மற்றும் பொதுமக்கள் கலந்துகொண்டு தமது அஞ்சலிகளைச் செலுத்தினர்.

 இந்த நினைவேந்தல் நிகழ்வுகளில் கலந்துகொண்டவர்கள் பின்வரும் கோரிக்கைகளை முன்வைத்தனர்:

• சூத்திரதாரிகள்: ஏழு ஆண்டுகள் கடந்த நிலையிலும், இந்தக் கொடூரத் தாக்குதலுடன் தொடர்புடைய உண்மையான சூத்திரதாரிகள் இன்னும் சட்டத்தின் முன் நிறுத்தப்படவில்லை. அவர்கள் விரைவில் கண்டறியப்பட வேண்டும்.
• நீதி: பாதிக்கப்பட்ட குடும்பங்களுக்கு வெறும் அனுதாபங்கள் மட்டும் போதாது, முழுமையான நீதியும் இழப்பீடும் வழங்கப்பட வேண்டும்.

இந்தத் தாக்குதலின் வடுக்கள் இன்னும் ஆறாத நிலையில், மட்டக்களப்பு மக்கள் மிகுந்த சோகத்துடன் தமது உறவுகளுக்கு அஞ்சலி செலுத்தியமை குறிப்பிடத்தக்கது.

வாலகிருஸ்ணா