நெல்லின அறுவடை விழா

இந்தியாவில் ஆயிரக்கணக்கான ஆண்டுகளுக்கு முன்னர் மன்னர்களால் பயன்படுத்தப்பட்ட கறுப்பு கவுனி, மாப்பிள்ளை சம்பா மற்றும் கரு இழை ஆகிய பாரம்பரிய நெல்லினங்கள் யாழ்ப்பாணம் - வட்டுக்கோட்டை பகுதியில் முதன்முறையாகப் பயிரிடப்பட்டு, அவற்றின் அறுவடை மற்றும் பொங்கல் விழா சிறப்பாக நடைபெற்றது.

குறித்த நெல்லினங்கள் இந்தியாவில் இருந்து கொண்டு வரப்பட்டு இவ்வாறு பயிரிடப்பட்டிருந்ததுடன், திங்கட்கிழமை (23) அறுவடை செய்யப்பட்டன. அதனைத் தொடர்ந்து, வயல் நிலத்தில் பொங்கல் விழா முன்னெடுக்கப்பட்டது. பொங்கலைத் தொடர்ந்து, பாரம்பரிய முறைப்படி வயல் மீண்டும் உழப்பட்டு, சிறுதானியப் பயிரான பயறு விதைக்கப்பட்டது.

நிகழ்வின் இறுதியில் அனைவருக்கும் பொங்கல் பரிமாறப்பட்டதுடன், யாழ்ப்பாணத்திலுள்ள இந்தியத் துணைத் தூதரகத்தினால் விவசாயிகளுக்கு விவசாய உபகரணங்களும் வழங்கி வைக்கப்பட்டன.

கலாநிதி சிதம்பரமோகன் தலைமையில் நடைபெற்ற இந்நிகழ்வில், யாழ். இந்தியத் துணைத் தூதுவர் சாய்முரளி, வட்டுக்கோட்டை பொலிஸ் நிலையப் பொறுப்பதிகாரி கொஸ்தா மற்றும் பெருமளவிலான விவசாயிகள் கலந்துகொண்டனர்.

மேற்குறிப்பிட்ட இந்த அபூர்வ நெல்லினங்கள் இலங்கையில் பயிரிடப்படுவது இதுவே முதல் முறை எனத் தெரிவிக்கப்படுகிறது.

 பு.கஜிந்தன்