அயர்லாந்தை வென்ற நெதர்லாந்து

நெதர்லாந்து, அயர்லாந்து அணிகளுக்கு இடையிலான மூன்று போட்டிகள் கொண்ட ஒருநாள் சர்வதேசப் போட்டித் தொடரில், உட்ரெச்ட்டில் நேற்று நடைபெற்ற முதலாவது போட்டியில் நெதர்லாந்து ஓர் ஓட்டத்தால் வென்றது.

இப்போட்டியில் முதலில் துடுப்பெடுத்தாடிய நெதர்லாந்து, கிரேய்க் யங்க் (3) சிமி சிங்க் (1), ஜோஷுவா லிட்டில் (3), அன்டி மக்பிரைனிடம் (1) விக்கெட்டுகளைப் பறிகொடுத்த நிலையில், டிம் வான் டர் குக்டனின் 49 (53) ஓட்டங்களுடன், 50 ஓவர்களில் சகல விக்கெட்டுகளையும் இழந்து 195 ஓட்டங்களைப் பெற்றது.

பதிலுக்கு, 196 ஓட்டங்களை வெற்றியிலக்காகக் கொண்டு துடுப்பெடுத்தாடிய  அயர்லாந்து, போல் ஸ்டேர்லிங்கின் 69 (112), சிமி சிங்கின் 45 (69) ஓட்டங்களுடன் போராடியபோதும், அணித்தலைவர் பீற்றர் சீலரிடம் 3, லோகன் வான் பீக்கிடம் 2, பிரெட் கிளாஸென், பிரண்டன் குளோவர், வாட் டர் குக்டனிடம்  தலா ஒவ்வொரு விக்கெட்டைப் பறிகொடுத்து, 50 ஓவர்களில் 9 விக்கெட்டுகளை இழந்து 194 ஓட்டங்களைப் பெற்று ஓர் ஓட்டத்தால் தோல்வியடைந்தது.

இப்போட்டியின் நாயகனாக வான் டர் குக்டன் தெரிவானார்.