இந்தியாவுக்கு 78 ஓட்டங்கள் தேவை

தென்னாபிரிக்காவுக்கெதிரான டெஸ்ட் தொடரைச் சமப்படுத்துவதற்கு இந்தியாவுக்கு 78 ஓட்டங்கள் தேவையாகவுள்ளது.

இரண்டு போட்டிகள் கொண்ட இத்தொடரின் முதலாவது போட்டியை ஏற்கெனவே இழந்துள்ள இந்தியா, கேப் டெளணில் நேற்று முன்தினம் ஆரம்பமான இரண்டாவது டெஸ்டின் முதலாவது இனிங்ஸில் 55 ஓட்டங்களுக்குள் தென்னாபிரிக்காவை சுருட்டியது.

தொடர்ந்து தமது முதலாவது இனிங்ஸில் துடுப்பெடுத்தாடிய இந்தியா, சகல விக்கெட்டுகளையும் இழந்து 153 ஓட்டங்களைப் பெற்றது. இதில், விராட் கோலி 46, றோஹித் ஷர்மா 39, ஷுப்மன் கில் 36 ஓட்டங்களைப் பெற்றனர். பந்துவீச்சில், ககிஸோ றபாடா, நன்ட்ரே பேர்கர், லுங்கி என்கிடி ஆகியோர் தலா 3 விக்கெட்டுகளைக் கைப்பற்றினர்.

இதையடுத்து தமது இரண்டாவது இனிங்ஸில் துடுப்பெடுத்தாடிய தென்னாபிரிக்கா, ஜஸ்பிரிட் பும்ரா (6), முகேஷ் குமார் (2), மொஹமட் சிராஜ், பிரசீத் கிருஷ்ணாவிடம் விக்கெட்டுகளைப் பறிகொடுத்து சகல விக்கெட்டுகளையும் இழந்து 176 ஓட்டங்களைப் பெற்றது. துடுப்பாட்டத்தில், ஏய்டன் மார்க்ரம் 106 ஓட்டங்களைப் பெற்றார்.

அந்தவகையிலேயே இப்போட்டியை வென்று தொடரைச் சமப்படுத்துவதற்கு 78 ஓட்டங்களை இந்தியா பெற வேண்டியுள்ளது.