றியல் வென்றது; அத்லெட்டிகோ தோற்றது

ஸ்பானிய லா லிகா தொடரில் இடம்பெற்ற போட்டிகளில் றியல் மட்ரிட் வென்றதுடன், அத்லெட்டிகோ மட்ரிட் தோல்வியடைந்துள்ளது.

தமது மைதானத்தில் இலங்கை நேரப்படி நேற்றுக் காலை நடைபெற்ற லெகனிஸ் அணியுடனான போட்டியில், 4-1 என்ற கோல் கணக்கில் றியல் மட்ரிட் வென்றது. றியல் மட்ரிட் சார்பாக, கரிம் பென்ஸீமா இரண்டு கோல்களையும் கரெத் பேல், சேர்ஜியோ றாமோஸ் ஆகியோர் தலா ஒவ்வொரு கோலையும் பெற்றனர். லெகனிஸ் சார்பாகப் பெறப்பட்ட கோலை குய்டோ கரில்லோ பெற்றிருந்தார்.

இதேவேளை, தமது மைதானத்தில் நேற்று முன்தினம் இடம்பெற்ற போட்டியில் அத்லெட்டிகோ மட்ரிட்டை செல்டா விகோ வென்றது. செல்டா விகோ சார்பாக, மக்ஸிமில்லியானோ கோமிஸ், லாகோ அஸ்பஸ் ஆகியோர் தலா ஒவ்வொரு கோலைப் பெற்றனர்.