2ஆவது ஆஷஸ் டெஸ்டில் முன்னிலையில் அவுஸ்திரேலியா

அவுஸ்திரேலியா, இங்கிலாந்து அணிகளுக்கிடையிலான ஐந்து டெஸ்ட் போட்டிகள் கொண்ட ஆஷஸ் தொடரில், அடிலெய்ட்டில் நேற்று ஆரம்பித்த இரண்டாவது போட்டியின் இன்றைய இரண்டாம் நாள் முடிவில் அவுஸ்திரேலிய அணி முன்னிலை பெற்றுக் காணப்படுகிறது.

பகல் – இரவு டெஸ்ட் போட்டியாக இடம்பெறும் இப்போட்டியில் முதலில் துடுப்பெடுத்தாடப் பணிக்கப்பட்ட அவுஸ்திரேலிய அணி, தமது முதலாவது இனிங்ஸில் 8 விக்கெட்டுகளை இழந்து 442 ஓட்டங்களைக் குவித்து தமது ஆட்டத்தை இடைநிறுத்தியது. துடுப்பாட்டத்தில், ஷோர்ன் மார்ஷ் ஆட்டமிழக்காமல் 126, டிம் பெய்ன் 57, உஸ்மான் கவாஜா 53, டேவிட் வோணர் 47, பற் கமின்ஸ் 44, ஸ்டீவ் ஸ்மித் 40, பீற்றர் ஹன்ட்ஸ்கொம்ப் 36 ஓட்டங்களைப் பெற்றனர். பந்துவீச்சில், கிரேய்க் ஒவெர்ட்டன் 3, ஸ்டூவர்ட் ப்ரோட் 2 விக்கெட்டுகளைக் கைப்பற்றினர்.

பதிலுக்கு, தமது முதலாவது இனிங்ஸில் துடுப்பெடுத்தாடி வரும் இங்கிலாந்து, மழை காரணமாக இடைநிறுத்தப்பட்டு, பின்னர் இன்றைய இரண்டாம் நாள் முடிவுக்கு வந்தபோது ஒரு விக்கெட்டை இழந்து 29 ஓட்டங்களைப் பெற்றிருந்தது. வீழ்த்தப்பட்ட விக்கெட்டை மிற்செல் ஸ்டார்க் கைப்பற்றினார்.