உலகக் கிண்ண இறுதிப் போட்டிக்கு ஆர்ஜன்டீனா அணி தெரிவு

உலகக் கிண்ண கால்பந்தாட்ட தொடரின் அரை இறுதிப் போட்டியில் ஆர்ஜன்டீனா அணி, சமநிலை முறியடிப்பு பனால்டி உதை மூலம் வெற்றி பெற்று இறுதிப் போட்டிக்குத் தெரிவாகியுள்ளது. 19ஆவது உலகக்கிண்ணத்தில் விளையாடும் ஆர்ஜன்டீனா அணி, ஐந்தாவது தடவையாக இறுதிப் போட்டிக்குத் தெரிவாகியுள்ளது. விளையாடிய 5 அரை இறுதிப் போட்டிகளிலும் ஆர்ஜன்டீனா அணி வெற்றி பெற்றுள்ளது. நெதர்லாந்து அணியுடன் மோதிய ஆர்ஜன்டீனா அணி, சமநிலை முறியடிப்பு பனால்டி உதையில் 4 இற்கு 2 என்ற கோல் கணக்கில் வெற்றி பெற்றது. 

 

வழங்கப்பட்ட 90 நிமிடங்களில் இரு அணிகளும் கோல்களைப் பெறவில்லை. மேலதிக நேரமாக வழங்கபட்ட 30 நிமிடங்களிலும் இரு அணிகளும் கோல்களைப் பெறவில்லை. கடந்த உலகக் கிண்ணத்தின் இறுதிப் போட்டியில் விளையாடிய நெதர்லாந்து அணி ஐந்தாவது தடவையாக அரை இறுதிப் போட்டியில் இன்று விளையாடி இருந்தது. இரு தடவைகள் மாத்திரமே நெதர்லாந்து அணி அரை இறுதிப் போட்டிகளில் வென்றுள்ளது. ஆர்ஜன்டீனா அணி இறுதியாக 1990ஆம் ஆண்டு இறுதிப் போட்டிக்குத் தெரிவாகி இருந்தது. 

 

ஆர்ஜன்டீனா இறுதிப் போட்டியில் ஜேர்மனி அணியுடன் மோதவுள்ள அதேவேளை, நெதர்லாந்து அணி மூன்றாமிடத்திற்கான போட்டியில் பிரேசில் அணியுடன் மோதவுள்ளது.