ஐ.தே.கவை பலமடையச் செய்ய வேண்டும்

“மட்டக்களப்பு மாவட்டத்திலும் கிழக்கு மாகாணத்திலும் ஐக்கிய தேசியக் கட்சியை பலமடையச் செய்ய வேண்டும்” என, அக்கட்சியின் மட்டக்களப்பு மாவட்ட முகாமையாளர் சசிதரன் கார்த்திக் தெரிவித்தார்.

மட்டக்களப்பு மாநகர சபையில் போட்டியிடுவற்கான ஐக்கிய தேசியக் கட்சியின் வேட்புமனுப்பத்திரத்தைத் தாக்கல் செய்ததன் பின்னர் கருத்துத் தெரிவிக்கும் போதே, அவர் மேற்கண்டவாறு தெரிவித்தார்.

இங்கு தொடர்ந்து கருத்து தெரிவித்த அவர், “மட்டக்களப்பு மாவட்டத்தில் ஐ.தே.க பலமிழந்து காணப்படுகின்றது. தற்போது கட்சிக்குப் புதிய இரத்தம் பாய்ச்சப்பட்டுள்ளது.

“ஐக்கிய தேசியக் கட்சி இந்த நாட்டில் சிறுபான்மை சமூகங்களை மதித்து அவர்களை ஒன்றினைத்துள்ள கட்சியாகும்.

“இந்தக் கட்சிக்கு நாம் இங்கு கொடுக்கும் ஆதரவுதான் எதிர்காலத்தில் நமது பிரதேசங்களை அபிவிருத்தி செய்ய உதவியாக அமையும்” என்றார்.