அலைபேசி நிலையத்தில் பெண் கைவரிசை

-ரஞ்சித் ராஜபக்ஷ

ஹட்டன் நகரிலுள்ள அலைபேசி விற்பனை நிலையமொன்றுக்கு அலைபேசி வாங்குவதற்கு வந்த பெண்ணொருவர், 3,000 ரூபாய் பெறுமதியான ஓர் அலைபேசியை விலைகொடுத்து வாங்கி, குறித்த நிலையத்துக்கு அலைபேசி வாங்க வந்த மற்றுமொரு இளைஞனின் 3,000 ரூபாய் பெறுமதியான மின்குமிழ் இருந்த பையைத் திருடிய சம்பவம், சீ.சீ.ரி.வி கெமராவில் பதிவாகியுள்ளது.

நேற்று வெள்ளிக்கிழமை காலை 10 மணியளவில் அலைபேசி விற்பனை நிலையத்துக்கு வந்து 15 நிமிடங்கள் இருந்த இப்பெண், புதிதாக வாங்கிய அலைபேசியையும் இளைஞனின் பையையும் எடுத்துக்கொண்டு வெளியேறியுள்ளார்.

இளைஞன், புதிதாக அமைத்த வீட்டுக்கு போடுவதற்காக வாங்கிய மின்குமிழ்களே திருட்டுப் போயுள்ளன.

புதிதாக அலைபேசியை வாங்கிய இளைஞன், மின்குமிழ்கள் வைத்திருந்த பையைத் தேடும் பொழுது அது காணாமால் போயிருப்பதைத் தெரிந்துகொண்டு கடை உரிமையாளரிடம் இது தொடர்பில் முறையிட்டுள்ளார்.

அதன்பின்னர், சீ.சீ.ரி.வி கெமராவைப் சோதித்தபோது மேற்குறிப்பிட்ட விடயம் அம்பலமாகியுள்ளது.

எனினும், குறித்த பெண்ணைத் தேடும் போது அப்பெண் தப்பிச்சென்றுள்ளதாகத் தெரிவிக்கப்படுகின்றது.