நீர் மின் உற்பத்தி நிலையத்தின் நிர்மாண பணிகள் இடை நிறுத்தம்

ரஞ்சித் ராஜபக்ஷ, மு.இராமச்சந்திரன்

பொகவந்தலாவை பிளான்டேசன் நிர்வாகம்,  கெசல்கமுவ ஒயா ஆற்றை மறித்து நிர்மாணித்துவரும்  நீர் மின் உற்பத்தி நிலையத்தின், நிர்மாண பணிகளை தற்காலிகமாக இடைநிறுத்தியுள்ளது.

நீர் மின் உற்பத்தி நிலையத்திலிருந்து அகழ்ந்தெடுக்கப்படும் மண், சட்டவிரோதமாக மாணிக்கக்கல் வியாபார நடவடிக்கைக்கு விற்கப்படுவதால்  இந்நிலையத்தின் நிர்மாணப்பணிகள் இடை நிறுத்தப்பட்டுள்ளன.

பொகவான தோட்ட பாலத்தருகில் நீர் மின் உற்பத்தி நிலையம் அமைக்கும் பணிகளை தோட்ட நீர்வாகம் தனியார் கம்பனியொன்றுக்கு வழங்கியுள்ளது.

இந்நிலையம் அமைக்கும் இடத்திலிருந்து அகழ்ந்தெடுக்கப்படும் மண், மாணிக்கக்கல் அகழ்வுக்காக சீனாகொலை தோட்ட பகுதிக்கு  சட்டவிரோதமாக கொண்டுச் செல்லப்படுகின்றமை தொடர்பில் பணியாளர்கள் கம்பனி நிர்வாகத்தின் கவனத்துக்கு கொண்டு வந்துள்ளனர்.

இதனையடுத்தே நிர்மாணப் பணிகள் தற்காலிகமாக இடைநிறுத்தப்பட்டுள்ளதாக தோட்ட நிர்வாகத்தினர் தெரிவிக்கின்றனர்.