‘ரிஷாட்டை ஏன் விசாரிக்க முடியவில்லை?’

துவாரக்ஷான் 

சமீபத்தில், குளியாபிட்டியில் இடம்பெற்ற பிரச்சினையைத் தீர்க்கச்​ சென்ற ​ஸ்ரீ லங்கா சுதந்திரக் கட்சியின் பொதுச் செயலாளர் தயாசிறி ஜயசேகரவை விசாரிக்க முடியும் என்றால், தற்போது, ரிஷாட் பதியூதீன் மீது முன்வைக்கப்பட்டுள்ள குற்றச்சாட்டுகளை வைத்து, அவரை ​ஏன் விசாரிக்க முடியாது என, ஸ்ரீ லங்கா சுதந்திரக் கட்சியின் நுவரெலியா மாவட்ட ​அமைப்பாளர் பெரியசாமி பிரதீபன் கேள்வியெழுப்பியுள்ளார்.  

ஹட்டனிலுள்ள ஸ்ரீ லங்கா சுதந்திரக் கட்சியின் கிளை அலுவலகத்தில், நேற்று (19) இடம்பெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும் போதே, அவர் மேற்கண்டவாறு தெரிவித்தார். 

அவர் தொடர்ந்து கருத்துத் தெரிவிக்கையில்,  

அரசாங்கத்தில் அங்கம் வகிக்கும் அமைச்சர்களுக்கும், பயங்கரவாதச் செயற்பாடுகளுடன் தொடர்புள்ளதாகத் தெரிவிக்கப்படுவதாகக் கூறிய அவர், எனினும், இவ்வாறு குற்றஞ்சுமத்தப்பட்டவர்களிடம் இதுவரைக்கும் விசாரணைகள் முன்னெடுக்கப்படவில்லை என்றும் கூறினார்.  

இந்நிலையில், அமைச்சர் ரிஷாட் பதியூதீனுக்கு எதிராகக் கொண்டுவரப்பட்டுள்ள நம்பிக்கையில்லாப் பிரரேரணைக்கு, சு.கவின் உறுப்பினர்கள் ஆதரவு வழங்கவேண்டும் என்றும் அவர் கூறியுள்ளார்.