பாதாள உலகக் குழு நபர் சடலமாக மீட்பு

(சுபுன் டயஸ்)

பல குற்றச்செயல்கள் காரணமாக தேடப்பட்டு வந்த 'தாபரே' எனும் நபர் தலவத்துகொட கிம்புலாவெவ பிரதேசத்தில் வைத்து இனந்தெரியாத நபர்களினால் சுட்டுக்கொல்லப்பட்டுள்ளார்.

40 வயதான இந்நபர் நேற்று காலை, பன்னிபிட்டிய- தலவத்துகொட பிரதான வீதியிலுள்ள அவரின் வீட்டிலிருந்து கடத்தப்பட்டிருந்தார்.  இன்று காலை 7.00 மணியளவில் அவரின் உடல் கண்டுபிடிக்கப்பட்டதாக பொலிஸ் பேச்சாளர் அஜித் ரோஹன தெரிவித்தார்.

இந்நபர், தலங்கம பொலிஸ் பிரிவிற்குட்பட் பிரதேசத்தில் பல குற்றச்செயல்களை மேற்கொண்ட குழுவொன்றின் தலைவர் எனத் தெரிவிக்கப்படுகிறது.

இக்கொலை தொடர்பாக பிரதி பொலிஸ் மா அதிபர் ஐ.எம். கருணாரட்னவின் பணிப்புரையின் பேரில் விசாரணைகள் நடத்தப்படுகின்றன.