வாள் வெட்டு : சந்தேக நபர்கள் அறுவருக்கு பிணை

செல்வநாயகம் கபிலன்

மல்லாகம் நீதிமன்ற வளாகத்துள் இடம்பெற்ற வாள் வெட்டு சம்பவத்துடன் தொடர்புபட்ட சந்தேகத்தில் கைதான சந்தேக நபர்கள் 06 பேரையும் தலா 1 இலட்சம் ரூபாய் பெறுமதியான இரண்டு ஆட்பிணையுடன் கூடிய 25 ஆயிரம் ரூபாய் காசுப்பிணையில் செல்ல மல்லாகம் மாவட்ட நீதவான் நீதிமன்ற  நீதவான் (27) அனுமதியளித்ததாக தெல்லிப்பளை பொலிஸார் ஞாயிற்றுக்கிழமை (28) தெரிவித்தனர்.

அத்துடன் சந்தேக நபர்கள் ஒவ்வொருவரும் பிரதி ஞாயிற்றுக்கிழமை, வெள்ளிக்கிழமை தோறும் தத்தமது கிராமசேவையாளர் பிரிவுக்கு சென்று கையொப்பம் இடுமாறு பணித்தார்.

கடந்த தை மாதம் 13 ஆம் திகதி மானிப்பாய் பகுதியில் இரு குழுக்களுக்கு ஏற்பட்ட தகராறு கைகலப்பாக மாறியிருந்தது.

சம்பவத்துடன் தொடர்புடைய சந்தேகநபர்களை மானிப்பாய் பொலிஸார் கைது செய்து அவர்களுக்கு எதிராக மல்லாகம் நீதிமன்றில் வழக்கு நடைபெற்று வந்தது.

இந் நிலையில் வழக்கு விசாரணைக்கு சென்றுவிட்டு வந்த இருவரை நீதிமன்றிற்கு வெளியில் சந்தேக நபர்கள் வாளாள் வெட்டியிருந்தனர்.

இச் சம்பவம் தொடர்பில் விசாரணைகளை மேற்கொண்ட தெல்லிப்பளை பொலிஸார், வாள் வெட்டுடன் தொடர்புடைய சந்தேக நபர்கள் ஆறு பேரை கைது செய்திருந்தமை குறிப்பிடத்தக்கது.